चरिकोट—दोलखाको वैतेश्वर गाउँपालिकामा क्यान्सर रोगका बिरामी बढ्दो अवस्थामा रहेको पाइएको छ । गाउँपालिकाको एउटै वडामा १८ जना क्यान्सरका बिरामी भेटिएका छन् ।
पछिल्ला दिनहरुमा क्यान्सर र मिर्गौलाका बिरामीको संख्या वृद्धि हुँदै गएको छ । पालिकामा अघिल्लो वर्षको तुलनामा यस वर्ष क्यान्सर र मिर्गौला रोगका बिरामी २५.२ प्रतिशतले वृद्धि भएको वैतेश्वर गाउँपालिकाका स्वास्थ्य शाखा प्रमुख बमबहादुर तामाङले जानकारी दिए ।
गाउँपालिकाको स्वास्थ्य शाखाले दिएको तथ्यांकअनुसार गत वर्ष ४२ जना क्यान्सर र मिर्गौलाका बिरामी रहेकोेमा यस वर्ष भने उक्त संख्या वृद्धि भई ६० जना पुगेको स्वास्थ्य शाखा प्रमुख तामाङले बताए । पालिकाको वडा नम्बर–८ बाहेक अन्य ७ वटा वडा क्यान्सर र मिर्गौलाका बिरामी रहेकोे स्वास्थ्य प्रमुख तामाङले बताए ।
उनका अनुसार वडा नम्बर–६ मात्रै १८ जना क्यान्सर बिरामी रहेका छन् । गत वर्ष यस वडामा १० जना क्यान्सर बिरामी रहेकोमा यस वर्ष उक्त संख्या बढेर १८ पुगेको वैतेश्वर–६ नाम्दुकी वडा सचिव सिमा लामाले बताइन् । त्यसैगरी, दोस्रो सबैभन्दा बढी क्यान्सरको बिरामी रहेको वडा नम्बर–४ रहेकोे छ । अघिल्लो वर्ष १२ जना क्यान्सरका बिरामी रहेकोे वडा नम्बर–४ मा यस वर्ष १३ जना रहेको छ ।
त्यसैगरी, वडा नम्बर–७ मा पनि अघिल्लो वर्षको तुलनामा दोब्बरले क्यान्सर तथा मिर्गौला रोगका बिरामी बढेका छन् । ७ मा गत वर्ष ६ रहेकोमा यस वर्ष क्यान्सर बिरामीको संख्या १२ पुगेको गाउँपालिकाको स्वास्थ्य शाखाले जनाएको छ । त्यसैगरी वडा नम्बर–३ मा पनि बिरामीको संख्या ८ पुगेको छ । गत वर्ष यस वडामा क्यान्सरका बिरामी ३ जना मात्रै रहेका थिए । त्यसैगरी, वडा नम्बर–२ मा ४ र वडा नम्बर–१ मा २ जना क्यान्सरको उपचार तथा औषधि खाइरहेका बिरामी रहेकोे स्वास्थ्य शाखाले जनाएको छ ।
खनपिन, जीवनशैली, वंशाणुगतलगायतका कारण क्यान्सर रोग लाग्ने गर्छ । विश्वमा सबैभन्दा धेरै मुत्यु गराउने रोगमध्ये प्रमुख रोग क्यान्सर हो । क्यान्सर बालकदेखि वृद्धसम्म जुनसुकै उमेर समूहलाई लाग्ने रोग हो । सरकारले क्यान्सर, डायलासिस, किड्नी प्रत्यारोपण र मेरूदण्डको पक्षघात भएका बिरामीलाई मासिक औषधि उपचार खर्च पाँच हजार रुपैयाँ दिने निर्णयअनुसार पालिकाले उक्त रोगका बिरामीको तथ्यांङ्क संकलन गरिरहेको छ ।
