जुम्ला—रक्तदाता प्रेमसागर कर्माचार्यले जुम्ला पुगेर १८० औं पटक रक्तदान गरेका छन् । गत शुक्रबार कर्णाली स्वास्थ्य विज्ञान प्रतिष्ठान शिक्षण अस्पताल जुम्लामा पुगेर रक्तदान गरेका हुन् ।
दुर्गमका नागरिकलाई रगत अभावले उपचारमा समस्या नहोस भन्ने उद्देश्यले कर्माचार्यले रक्तदान गरेका हुन् । काठमाडौं महानगरपालिका–२८ का ६१ वर्षीय कर्माचार्य यसअघि १७९ औं पटक रक्तदान गरिसकेका छन् ।
कर्णाली स्वास्थ्य विज्ञान प्रतिष्ठान स्थापना भएको डेढ दशकसम्म पनि ब्लड बैंक स्थापना नभएकोले उपचारमा भएको असहजता अन्त्य गर्न ब्लड बैंकको स्थापनाको पहल गर्न जुम्ला पुगेको उनले बताए ।
‘रगत नपाएर धेरै बिरामी छटपटिरहेको हामीले देखेका छौं । तर, ब्लड बैंक स्थापना गर्न कसैको चासो देखिन्न् । मैले मात्र एक प्वाइन्ट रगत दिएर ब्लड बैंक खुल्न भन्न खोजेको पनि होइन्,’ उनले भने, ‘मैले देशभर ब्लड बैंक खोल्नुपर्छ भन्ने चेतना फैलाउन खोजेको हुँ । सोही क्रममा १८० पटक रक्तदान गरिसके ।’ युवा, नागरिक समाज सबै मिलेर जुम्लामा रगत अभावको दीर्घकालीन समाधान खोज्न जरुरी रहेको उनले जानकारी दिए ।
दुर्गमदेखि सुगमका सबै स्वास्थ्य संस्थामा रगतको अभाव हुन नदिन र उपचारलाई सहज बनाउनुपर्छ भन्ने जाँगरणसहित देश दौडाहामा रहेको कर्मचार्यले बताए ।
रक्तदाता कर्माचार्यको अगुवाईमा जुम्लामा रगत व्यवस्थापनको लागि एक समिति नै गठन गर्ने तयारी भएको छ । कर्माचार्यको रक्तदानका लागि संस्कृतिक संरक्षण तथा प्रवर्द्धन समितिले आयोजना गरेको हो ।