चरिकोट—पहिरोमा पुरिएका साहिल भुजेललाई सुरक्षाकर्मीले जीवितै उद्धार गरिएका थिए । शनिबार दिनभर भएको भारी वर्षाको कारण भीमेश्वर नगरपालिका–६ घ्याङचौरमा पहिरो जाँदा २ वर्षीय साहिल भुजेल घरभित्रै पुरेका थिए ।
जीवितै उद्धार गरिएका भुजेललाई भीमेश्वर नगरपालिका नगर कार्यपालिकाको बैठकले मासिक १० हजार रुपैयाँ दिने निर्णय गरिएको नगर प्रमुख ईश्वरनारायण मानन्धरले जानकारी दिए ।
पहिरोमा परी भुजेलका आमा बुबा र दाजु गुमाएका थिए । कार्यपालिकाको बैठकले भुजेललाई मासिक १० हजार रुपैयाँ र राम्रो व्यवस्था नहुन्जेल शिक्षा, स्वास्थ्य उपचार, पालन पोषण र १२ कक्षासम्मको पढ्ने जिम्मेवारी भीमेश्वर नगरपालिकाले लिने नगर प्रमुख मानन्धरले बताए ।
त्यस्तै, मृत्यु भएका उनका आमा बुवा र दाजु गरी ३ जनाको मृत्यु संस्कार गर्न १ लाख र दाह संस्कार गर्न ४५ हजार रुपैयाँ दिने निर्णय गरिएको नगरपालिकाले जनाएको छ । अविरल वर्षासँगै आएको पहिरोले घर पुर्दा साहिल भुजेलका बुबा राजकुमार भुजेल आमा राधिका भुजेल र दाइ सुजन भुजेलको मृत्यु भएको थियो ।
साहिल भुजेललाई डेढ घण्टापछि जीवितै उद्धार गरिएको नगर आपतकालीन कार्यसञ्चालन केन्द्रका सम्पर्क व्यक्ति तथा नेपाल स्काउट विपद् व्यवस्थापन तालिम प्रशिक्षक थीरबहादुर खड्काले जानकारी दिए ।
