काठमाडौं—स्वास्थ्य तथा जनसंख्या मन्त्री प्रदीप पौडेलले स्वास्थ्यका उच्च अधिकारीहरुको ब्यापक जिम्मेवारी हेरफेर गरेका छन् । आइतबार स्वास्थ्य पौडेलले मन्त्रीस्तरीय निर्णय गर्दै स्वास्थ्यका उच्च अधिकारीहरुको व्यापक जिम्मेवारी हेरफेर गरेका हुन् ।
स्वास्थ्य सेवा विभागको महानिर्देशकमा डा. विकास देवकोटालाई लगिएको छ । यसअघि विभागको महानिर्देशक डा. संगीता मिश्रा थिइन् । उनलाई मन्त्रालयमा ल्याइएको छ ।
अतिरिक्त सचिव डा. देवकोटालाई मन्त्रालयबाट विभागको महानिर्देशकमा लगिएको हो । त्यसअघि उनी लुम्बिनी प्रदेशको स्वास्थ्य सचिवका भएका थिए ।
उपचारात्मक महाशाखाको जिम्मेवारीमा डा. सुधा देवकोटालाई ल्याइएको छ । यसअघि उक्त महाशाखा प्रमुख रहेका डा. अनुप बाँस्तोलालाई शुक्रराज टपिकल तथा सरुवा रोग अस्पताल सरुवा गरिएको छ ।
स्वास्थ्य तालिम केन्द्रमा यसोदा अर्याललाई लगिएको छ । डा. अनुप भट्टचनलाई सार्क टिबी रोग केन्द्रमा पठाइएको छ ।
मन्त्रालयका प्रवक्ता र केन्द्रीय कारागार अस्पतालका निर्देशक रहेका डा. प्रकाश बुढाथोकीलाई मन्त्रालय ल्याइएको छ । केन्द्रीय कारागार अस्पतालमा सार्क टिबी रोग केन्द्रमा रहेकी डा. मनिषा रावललाई पठाइएको छ ।
विभागको व्यवस्थापन महाशाखा प्रमुखमा डा. पवनजंग रायमाझीलाई लगिएको छ । यसअघि उक्त ठाउँमा रहेका डा. श्रवण थापाको ट्मा सेन्टर सरुवा भएको छ ।
मन्त्री पौडेलले वीरगन्जस्थित नारायणी अस्पतालको मेडिकल सुपरिटेन्डेन्टमा डा. चुमनलाल दासलाई पठाएका छन् । डा. दास यसअद्धि मन्त्रालयको अन्तर्राष्ट्रिय समन्वय महाशाखामा थिए । उनको ठाउँमा डा. भीमप्रसाद सापकोटालाई ल्याइएको छ ।
निजी अस्पतालको म्यानेजर र कर्मचारी सरुवामा अहिलेका निमित्त मेसु डा. एनामुल हक विवादित बनेका थिए । डा. हक विवादित बनेपछि मन्त्री पौडेल वीरगन्जमा नयाँ मेसु पठाउनुपर्ने दबाबमा थिए ।
यस्तै, गुणस्तर मापन तथा नियमन महाशाखाको जिम्मेवारी डा. सरोज शर्माले पाएका छन् । यसअघि उक्त महाशाखा प्रमुखको जिम्मेवारीमा डा. मदन उपाध्याय थिए । डा. उपाध्यायलाई वीर अस्पताल लगिएको छ ।
यसैगरी, कोशी अस्पतालको प्रमुख डा. रुणा झालाई लगिएको छ । यसअघि उक्त अस्पतालको मेसुमा डा. रविनराज सिंह रहेका थिए । गजेन्द्रनारायण अस्पतालको जिम्मेवारी डा. श्रीराम तिवारीले पाएका छन् ।
भेरी अस्पतालको मेसुमा डा. निराजन सुवेदीलाई नियुक्त गरिएको छ । यसअघि उक्त अस्पतालको मेसु डा. प्रकाश थापा रहेका थिए ।
