जुम्ला—दातृ निकायको सहयोगमा तातोपानी गाउँपालिकाका दुर्गम गाउँबस्तीमा १८ वर्षमुनि बालबालिकामा अपांगता पहिचान शिविर सञ्चालन गर्ने लागिएको छ । सेभ द चिल्ड्रेनका आयोग सहयोग, किर्डाक नेपाल जुम्लाको सहजीकरणमा कर्णाली स्वास्थ्य विज्ञान प्रतिष्ठान जुम्लाको प्राविधिक सहयोग र तातोपानी गाउँपालिका जुम्लाको समन्वयमा शिविर सञ्चालन गर्न लागिएको हो ।
तातोपानी गाउँपालिका स्वास्थ्य शाखा प्रमुख गुरुप्रसाद चौलागाईका अनुसार १ असोजदेखि ६ असोजसम्म वडा नम्बर १–८ सम्मका बालबालिकाले सेवा प्राप्त गर्ने गरी शिविर सञ्चालन गरिनेछ ।
‘यो गाउँपालिकामा अति दुर्गममा पर्ने ७ र ८ नम्बर वडा भेरीखोला क्षेत्र हो । यो क्षेत्रमा पर्ने टोप्ला आधारभूत स्वास्थ्य सेवा केन्द्र र स्वास्थ्य चौकी ताम्ती लामाबगरमा १ र २ असोजमा शिविर सञ्चालन हुनेछ,’ उनले भने ।
यस्तै, तातोपानी स्वास्थ्य चौकी लिताकोटमा ४ असोजमा र लाम्रा स्वास्थ्य चौकीमा ६ असोजमा अपांगता पहिचान शिविर सञ्चालन गरिने शाखा प्रमुख चौलागाईले बताए ।
किर्डाक नेपाल जुम्लाका डकुमेण्टेशन संयोजक किरण पौडेलकाअनुसार अपांगता सम्बन्धि १८ वर्षमुनिका बालबालिकामा के कस्ता समस्या भन्ने शिविरमा पहिचान गरिनेछ । अपांगता पहिचान गर्न स्क्रिनिङ क्याम्प सञ्चालन गरिएको हो । ‘पहिचान भएको अपांगता बालबालिकालाई आवश्यकताअनुसार सहयोगी सामग्री प्रदान गरिनेछ,’ उनले भने ।
