चरिकोट—दोलखा भीमेश्वर नगरपालिकाका अधिकांश स्वास्थ्य संस्थाहरुमा महिलाले नेतृत्व गरेका छन् । भीमेश्वर नगरपालिकामा रहेको ७ वटा सहरी स्वास्थ्य केन्द्रमा सबै महिला स्वास्थ्यकर्मी नै प्रमुख रहेर नेतृत्व गरेका छन् ।
नगरपालिकामा रहेको एउटा आधारभूत स्वास्थ्य केन्द्रमा पनि महिला स्वास्थ्यकर्मी नै प्रमुख छन् । ६ वटा स्वास्थ्य चौकीमध्ये ५ वटामा महिला स्वास्थ्य प्रमुख रहेका छन् । अहिलेसम्म भीमेश्वर नगरपालिका–२ को स्वास्थ्य चौकीमा मात्र एक जना पुरुष स्वास्थ्यकर्मी प्रमुख रहेका छन् ।
भीमेश्वर नगरपालिकाभित्र ९ वटा वडामा, ६ वटा स्वास्थ्य चौकी, १ सहरी स्वास्थ्य केन्द्र र ७ वटा आधारभूत स्वास्थ्य केन्द्र रहेका छन् । अधिकांश स्वास्थ्य संस्थाहरुमा विगतदेखि नै महिला स्वास्थ्यकर्मीहरुले नेतृत्व पाएको भीमेश्वर नगरपालिका स्वास्थ्य शाखा प्रमुख श्याम खड्काले जानकारी दिए ।
भीमेश्वर नगरपालिका सदरमुकामको नगरपालिका र छोराछोरी पढाउनको लागि सदरमुकाम सरुवा हुन थालेकाले महिला स्वास्थ्यकर्मीको संख्यामा वृद्धि हुन सक्ने प्रमुख खड्काले बताए । भीमेश्वर नगरपालिकाभित्र एउटा प्रादेशिक अस्पताल र ३ वटा निजी अस्पताल छन् ।
प्रदेश र संघको कर्मचारी समायोजन र लोकसेवामा महिलाहरुले अवसर पाएपछि महिला स्वास्थ्यकर्मीले नेतृत्व गर्ने अवसर पाएको हो । साथै, स्वास्थ्य संस्थामा महिला स्वास्थ्यकर्मी देखेपछि महिलाहरु ढुक्कले उपचार गर्न आउने गरेको सुष्षाक्षमावती स्वास्थ्य चौकीका हेल्थ असिस्टेण्ट पवित्र बाँस्तोलाले बताए ।
बाँस्तोला यस स्वास्थ्य चौकीमा २०७७ सालदेखि कार्यरत छन् । अहिले यस स्वास्थ्य चौकीमा वार्षिक ७० प्रतिशतभन्दा बढी महिलाहरु स्वास्थ्य उपचारको लागि आउने गरेका छन् । महिलाहरुको पाठेघर खस्ने, युटीआई र पीआईडीलगायतका रोगहरु लिएर आउने गरेको बाँस्तोलाले बताए ।
