जुम्ला—कर्णाली स्वास्थ्य विज्ञान प्रतिष्ठान शिक्षण अस्पताल जुम्लामा ब्लड बैंक स्थापना गरिने भएको छ । अमेरिका–नेपाल मेडिकल फाउण्डेसनको एक करोड २३ लाख रुपैयाँ सहयोगमा प्रतिष्ठानमा ब्लड बैंक स्थापना गरिने भएको हो ।
प्रतिष्ठानमा ब्लड बैंक नहुँदा शल्यक्रियाका लागि समस्या हुने गरेको थियो । प्रतिष्ठानका उपकुलपति डा. मंगल रावलले अमेरिका–नेपाल मेडिकल फाउण्डेसनले केही समयअघि सिकागो सहरमा आयोजना गरेको तीन दिवसीय सभामा दुर्गमको स्वास्थ्य सेवाका चुनौती र सम्भावनाका विषयमा प्रस्तुतीकरण दिएका थिए ।
उक्त प्रस्तुतीकरणमा उल्लेख गरिएका कर्णालीका स्वास्थ्य समस्यालाई मध्यनजर गर्दै फाउण्डेसनको लगानीमा ब्लड बैंक स्थापना हुने उपकुलपति डा. रावलले जानकारी दिए ।
उपकुलपति डा. रावललाई फाउण्डेसनको २८ औं सभाका अवसरमा ब्लड बैंक स्थापना गर्न सहयोग रकम प्रदान गरिएको हो । सो अवसरमा कर्णाली स्वास्थ्य विज्ञान प्रतिष्ठान र फाउण्डेसनबीच भविष्यमा हुन सक्ने सहकार्यका विषयमा पनि छलफल भएको डा. रावलले जानकारी दिए ।
फाउण्डेसनको सभामा भाग लिन डा. रावलसहित चिकित्सा विज्ञान राष्ट्रिय प्रतिष्ठान (न्याम्स)का उपकुलपति प्रा.डा भुपेन्द्र बस्नेत, नेपाल चिकित्सक संघका अध्यक्ष डा. अनिल कार्की र नेपाल स्वास्थ्य अनुसन्धान परिषद्का सदस्य सचिव डा. प्रमोद जोशीलगायत नेपाली चिकित्सकहरु अमेरिका पुगेका थिए ।
फाउण्डेसनले नेपालको स्वास्थ्य क्षेत्र सुधारमा सहयोग र सहकार्य गर्दै आइरहेको छ । प्रतिष्ठान स्थापनाको १३ वर्षसम्म पनि ब्लड बैंक स्थापना नहुँदा बिरामीलाई रगत आवश्यक पर्दा नेपाली सेना, सशस्त्र प्रहरी गुहार्नुपर्ने बाध्यता छ ।
