चरिकोट—पाठेघरको मुखमा हुने क्यान्सरको निःशुल्क स्वास्थ्य शिविर आयोजना गरिएको छ । पाठेघरको मुखको क्यान्सर पहिचान गरी उपचार गर्नको लागि आयोजना गरिएको हो ।
दोलखाको तामाकोशी गाउँपालिकाले आयोजना गरिएको शिविरमा १७२ जना महिलाहरुले सेवा लिएका छन् । विशेषगरी, पाठेघरको मुखमा हुने क्यान्सरको पहिचान गर्न भिआईए (एसिड राखेर भाइरसको कोषिका हेर्ने विधि) परीक्षण तथा निःशुल्क स्वास्थ्य उपचार गरिएको पालिकाका स्वास्थ्य शाखा प्रमुख अरुणकुमार मिश्रले जानकारी दिए ।
स्वास्थ्य शाखाका प्रमुख मिश्रको अनुसार भीआईए परीक्षणले केही वर्षपछि पाठेघरको मुखको क्यान्सरको अवस्था कस्तो छ भन्ने पहिचान हुनेछ । औषधी राखेर हेरेपछि क्यान्सर बनाउने एचपिभी जीवाणु पोजेटिभ वा नेगेटिभ के छ भन्ने पत्ता लाग्ने भएकाले यो विधि अपनाउने गर्दछ । कुन अवस्थामा छ र उपचारको विधि सोहीअनुसार अपनाउने गर्दछ । यो विधिबाट एचपिभी भाइरस पत्ता लागेमा क्यान्सर हुनुअघि नै उपचार गरी बच्न सकिने चिकित्सकहरुले बताए ।
यस पालिकाको मालु—४ र हाँवा ७ को स्वास्थ्य संस्थाहरूमा क्यान्सरको पहिचान गर्नका लागि शिविर आयोजना गरेको थियो । शिविरमा परीक्षण गरिएका १० जना महिलामा भीआईए पोजेटिभ र ८ जनामा आङ खस्ने समस्या देखिएको थियो । कतिपय महिलाको पाठेघरको मुखमा घाउ भएको, पाठेघरको मुखमा मासु पलाएको लगायत विभिन्न खालका सङ्क्रमण देखिएको स्वास्थ्य शाखा प्रमुख मिश्रले जानकारी दिए ।
आर्थिक अभावका कारण सुविधासम्पन्न अस्पतालहरुबाट स्वास्थ्य सेवा लिन नसक्ने महिलाहरुको समस्यालाई दृष्टिगत गर्दै गाउँमै स्वास्थ्य शिविरको आयोजना गरिएको तामाकोशी गाउँपालिका ४ वडाअध्यक्ष नारायण खड्काले बताए । वडा कार्यालयले स्वास्थ्य क्षेत्रलाई बजेट विनियोजन गरी स्वास्थ्य शिविर आयोजना गर्दै आएको छ ।
धुलिखेल अस्पताल र तामाकोसी अस्पतालका स्वास्थ्यकर्मीले महिलाहरुको स्वास्थ्य परीक्षण गरिएको थियो ।
