विराटनगर—इन्टर सिटी कविता प्रतियोगिताको उपाधि विराटनगरस्थित सेन्ट मेरिज स्कुलकी आर्शी पोखरेलले जितेकी छिन् ।
मंगलबार ‘विश्व महिनावारी स्वच्छता’ दिवसको अवसर पारेर विराट हेल्थकेयर इन्डस्ट्रिजले आयोजना गरेको प्रतियोगितामा २९ जना विद्यार्थीहरुलाई पछि पार्दै आर्शीले कविता प्रतियोगिताको उपाधि जितेकी हुन् ।
उनले उपाधिसँगै नगद १५ हजार रुपैयाँको साथै वाइट मुन सेनेटरी प्याड र क्युरा हेल्थको तर्फबाट विभिन्न गिफ्ट ह्याम्पर जितेकी छिन् ।
यसैगरी, प्रतियोगितामा इटहरीस्थित विश्व आदर्श स्कुलकी साइमा कार्की द्धितीय र विश्व आदर्श विद्यालयका अदिती भट्टराई तृतीय भइन् । उनीहरुले क्रमसः ९ हजार रुपैयाँ र ६ हजार रुपैयाँ पुरस्कार जिते ।
प्रतियोगितामा ९ वटा विद्यालयका ३० जना विद्यार्थीहरुले भाग लिएका थिए । प्रतियोगिताको निर्णायकहरुमा विराट टिचिङ अस्पतालका भाइस चेयरम्यान डेनिस कार्की, विराट हेल्थकेयर इन्डस्ट्रिज ब्राण्ड म्यानेजर दिक्षा थापा, शशीकला तिवारी खड्कालगायत रहेका थिए ।
