पोखरा—गण्डकी प्रदेशका एम्बुलेन्स चालकका लागि प्रि हस्पिटल केयर तालिम प्रदान गरिएको छ । २३ देखि १५ चैतमा स्वास्थ्य तालिम केन्द्र गण्डकी प्रदेशको आयोजनामा तालिम सञ्चालन गरिएको हो ।
तालिमको गण्डकी स्वास्थ्य निर्देशनालयका निर्देशक खिमबहादुर खड्काले उद्घाटन गरेका थिए । तालिममा गण्डकीका मनाङ, मुस्ताङ र नवलपरासीबाहेकका ८ जिल्लाका १४ जनाका सहभागिता थियो ।
तालिम संयोजक शैलेन्द्रकुमार सिंहका अनुसार राष्ट्रिय स्वास्थ्य तालिम मापदण्डमा आधारित भई सञ्चालन गरिएको हो । तालिम प्राप्त चालकले मात्रै एम्बुलेन्स चलाउन पाउने नियम छ ।
तालिम संयोजक सिंहकाअनुसार तालिम केन्द्रमा यसअघि २२ देखि २४ माघसम्म यही प्रकृतिको तालिम सञ्चालन गरिएको थियो । त्यतिबेला १३ जनालाई प्याकेजकै तालिम प्रदान गरिएको थियो । ‘बिरामीलाई अस्पताल पुर्याउनुभन्दा पहिले एम्बुलेन्स चालकले के कस्ता काम गर्ने, नियम कानुन के छ ? ट्राफिक नियम के छ आदि कुरा सिकाउँछौं,’ सिंह भन्छन् ।
एम्बुलेन्सलाई ए र बी ग्रेडमा वर्गीकरण गरिएको छ । एम्बुलेन्स सञ्चालन निर्देशिकाले सी ग्रेडको एम्बुलेन्सलाई बिरामी ओसार–पसार गर्ने साधनका रुपमा परिभाषित गरेको छ ।
गण्डकीमा ए ग्रेडका एम्बुलेन्स असाध्यै कम भएकाले पूर्ण रुपमा पालना गर्न सकिएको छैन । राष्ट्रिय एम्बुलेन्स निर्देशिकाले ग वर्गमा सञ्चालित एम्बुलेन्सलाई ख वा क वर्गमा स्तरोन्नती गर्नुपर्ने भनेपनि सो अनुसार हुन सकेको छैन । निर्देशिका अनुसार एम्बुलेन्स चालकले राष्ट्रिय तालिम केन्द्रको तालिम लिएको हुनुपर्ने व्यवस्थाअनुसार तालिम सञ्चालन गरिएको हो ।
