पोखरा—लमजुङको सुन्दरबजारस्थित नमुना सामुदायिक अस्पताल (एचडिसिएस)ले जनताको पहुँचमा स्वास्थ्य सेवा पु¥याउने गरी सेवा विस्तार गरेको छ । १५ शैय्याको उक्त अस्पतालले २५ शैय्या सञ्चालनका लागि भौतिक संरचना तयार गरेको छ ।
सरकारी नियांमक निकायबाट अनुगमन भइरहेको र छिट्टै स्वीकृती पाउने अस्पताल प्रमुख हेमन्त श्रेष्ठ बताउँछन् । २५ शैय्या स्वीकृत पाए स्वास्थ्य बीमा सेवा पनि प्रदान गर्न सकिने उनको भनाइ छ ।
अस्पतालमा ४ जना विशेषज्ञ चिकित्सक र एक जना मेडिकल अफिसर रहेका छन् । ५ जना नर्सिङ स्टाफ, ८ जना प्यारामेडिक्सलगायत ४० जना जनशक्तिबाट अस्पतालले सेवा प्रदान गर्दै आएको छ । अस्पतालको ओपीडीमा दैनिक औसतमा ५० जना हाराहारीमा बिरामी आउने अस्पताल प्रमुख श्रेष्ठ बताउँछन् । हाडजोर्नीको जटिल शल्यक्रिया, सिटीस्क्यान, एमआरआई गर्नुपर्ने र मुटु सम्बन्धी समस्या भएका बिरामी रिफर गर्ने गरिएको छ । मुटु सम्बन्धी समस्या भएकालाई गंगालाल राष्ट्रिय मुटु केन्द्रमा नै रिफर गर्ने गरिएको उनले जानकारी दिए ।
अस्पतालले फिजियोथेरापी सेवा सुरु गरेको छ । अस्पतालमा लमजुङ, गोरखा, तनहुँ र कहिलेकाहीँ मनाङबाट पनि बिरामी आउने गर्छन् । अस्पतालले भोटेओढार सहरी स्वास्थ्य केन्द्रको सहयोगमा निःशुल्क स्वास्थ्य शिविर सञ्चालन गर्दै आएको छ । एचडिसिएसले विपद् र स्वास्थ्य सरोकार रेडियो कार्यक्रमसमेत सञ्चालन गरेको छ ।
बिरामीका लागि एम्बुलेन्सले सेवा पनि अस्पतालले दिइरहेको छ । आँखा उपचार सेवा थप गर्ने, हाडजोर्नी, बालरोग सम्बन्धी सेवा थप गर्ने योजना रहेको श्रेष्ठले बताए ।
एलोप्याथिक उपचार पद्धतिअन्तर्गत हाडजोर्नीको समस्या समाधानमा फिजियोथेरापी प्रयोग हुन्छ । फिजियोथेरापी पद्धतिमा औषधिको प्रयोगभन्दा बढी शरीरका जोर्नीहरू, चिसो–तातोको प्रयोग, मांसपेशीका तन्तुलाई चलाएर उपचार गरिने श्रेष्ठ बताउँछन् ।
अस्पतालले सेवा विस्तारको क्रममा विशेषज्ञ सेवालाई जोड दिएको छ । अस्पतालमा स्त्रीरोग विशेषज्ञ, एमडिजिपी डाक्टर, मिर्गौला रोग विशेषज्ञ, इमर्जेन्सी मेडिसिन विशेषज्ञ चिकित्सक उपलब्ध छन् । एक जना मेडिकल अफिसर कार्यरत छन् । एपेन्डेक्टोमी, हर्निया र हाइड्रोसिलको शल्यक्रिया नमुना अस्पतालमै हुने गरेको छ ।
अस्पतालमा दन्त सेवा, प्रयोगशाला सेवा, भिडियो एक्सरे, एक्सरे, मनोविमर्श, फार्मेसीलगायत सेवा पनि उपलब्ध छन् । समुदाय स्वास्थ्य सचेतना, निःशुल्क स्वास्थ्य शिविर, आमा समूहमा सचेतना, विद्यालय स्वास्थ्य कार्यक्रम, इमर्जेन्सी मेडिसिन सेवासमेत अस्पतालले प्रदान गर्दै आएको छ ।
गरिब तथा असहायका लागि शल्यक्रिया र औषधिसमेत निःशुल्क प्रदान गरिने श्रेष्ठको भनाइ छ । ‘यहाँ जनचेतनाको अलि कमी नै रहेछ, पहिले फार्मेसीबाट सिधै औषधि खाने बानीले गर्दा इन्भेस्टिगेसन गर्न नचाहने समस्या छ । सिधंै हाइडोजको औषधी माग्ने कुरा च्यालेन्जिङ छ । बिरामी सिकिस्त नभई अस्पताल नै आउँदैनन्,’ श्रेष्ठ भन्छन्, ‘आइहाले पनि भर्ना भएर उपचार गर्न चाहँदैनन् । सकेसम्म हामी भर्ना गर्न त भन्दैनौं । मिसन अस्पताल भएकाले शुल्क महंगो पनि छैन । हामीले अन्य अस्पतालको तुलनमा सुलभ सेवा दिदैं आएका छौं ।’
