काठमाडौं—प्रधानमन्त्री पुष्पकमल दाहालले चिकित्सा शिक्षा र नर्सिङ क्षेत्रका समस्याहरू प्याकेजमै सम्बोधन गर्नुपर्ने बताएका छन् । सोमबार प्रधानमन्त्रीको कार्यकक्ष सिंहदरबारमा नर्सिङ क्षेत्रका समस्या सम्बोधन गर्नेबारे भएको उच्चस्तरीय छलफलमा प्रधानमन्त्रीले सो कुरा बताएका हुन् ।
‘नर्सिङ शिक्षाको कुरा गरिरहँदा नर्सिङ र सिटीइभिटीको क्षेत्राधिकार बाझिने गरेको परिस्थिती पनि छ। त्यसलाई हामीले क्लियर गरेर जानुपर्छ,’ उनले भने । चिकित्सा शिक्षा र नर्सिङ क्षेत्रका समस्या सम्बोधनका निम्ति छिट्टै चिकित्सा शिक्षा आयोगको बैठक बसिने प्रधानमन्त्रीले जानकारी दिए ।
‘चिकित्सा शिक्षा आयोगको बैठक हामी छिट्टै बस्छौं। स्वास्थ्य क्षेत्रका समस्या के हुन्, नर्सिङ क्षेत्रका समस्या के हुन्, त्यसबारे वृहत छलफलमार्फत एउटा निष्कर्षमा पुग्नुपर्छ,’ प्रधानमन्त्री दाहालले भने, ‘आयोगको बैठक बसेर हामी अध्ययन समिति नै बनाएर त्यसबारे व्यवस्थित काम गरौं। त्यसका राष्ट्रिय योजना आयोगलाई पनि समावेश गरेर जाउँ।’
उनले चिकित्सा शिक्षा ऐनका समस्या संशोधनको प्रक्रियाबाट सम्बोधन गर्नुपर्नेमा जोड दिए । ‘ऐनका समस्या ऐन संशोधनको प्रक्रियाबाट नै सम्बोधन गर्नुपर्छ। तर, ऐनले जति कुराको बाटो खोलिदिएको छ, त्यसको सम्बोधनका लागि हामीले नै तत्परता देखाउनुपर्छ,’ दाहालले भने, ‘ऐनमा भएको व्यवस्था लागू गर्न हामी चुक्नु भएन। अहिले भएको साधन स्रोतका आधारमा गर्न सकिने कामहरू कार्यतालिका बनाएर गरौं।’
बैठकमा प्रधानमन्त्रीसँगै उपप्रधानमन्त्रीद्वय पूर्णबहादुर खड्का, नारायणकाजी श्रेष्ठ, शिक्षा, विज्ञान तथा प्रविधिमन्त्री अशोककुमार राई, नेपाल सरकारका मुख्यसचिव डा. बैकुण्ठ अर्याल, प्रधानमन्त्री कार्यालयका सचिवहरू, शिक्षा मन्त्रालयका सचिव सुरेश अधिकारी, स्वास्थ्य सचिवद्वय डा. रोशन पोखरेल, देवकुमारी गुरागार्इं, चिकित्सा शिक्षा आयोगका सदस्य सचिव कृष्णकुमारी काप्री, नर्सिङ काउन्सिलका रजिष्टार शुक्ला खनाललगायत उपस्थित थिए ।
