काठमाडौं—चिकित्सा शिक्षा आयोगका कार्यकारी उपाध्यक्ष डा. अन्जनीकुमार झाले कार्यस्थलमा यौन दुर्व्यवहारजस्तो संवेदनशील मुद्धामा आफैले कारवाही गरेका एक जनालाई आयोगको कम्प्युटर अपरेटरमा नियुक्त गरेका छन् । नेपाल स्वास्थ्य अनुसन्धान परिषद् (एनएचआरसी)मा कार्यस्थलमा यौन दुर्व्यवहार गरेको पाइएपछि जागिर गुमाएका विजयकुमार झालाई डा. अन्जनीले आफ्नै सचिवालयमा रहने गरी कम्प्युटर अपरेटर (सुब्बा सरह)मा नियुक्ति दिएका हुन् ।
विजय तिनै हुन्—जो एनएचआरसीमा तालिम अधिकृत रहँदा सहकर्मीमाथि दुर्व्यवहारका कारण दुई पटक कारवाहीमा परेका थिए । पहिलो पटक उनलाई डा. अन्जनीले नै निलम्ब गरेका थिए भने दोस्रो पटक छानविनबाट दोषी पाइएपछि जागिरबाटैं निष्काशनमा परेका थिए ।
आयोगका सदस्यसचिव कृष्णप्रसाद काप्रीले विजयलाई कम्प्युटर अपरेटरमा नियुक्त गरेको पुष्टि गरे । उनले विजयको निवेदन आएको, तालिम लिएको तथा अन्य प्रमाणपत्रका आधार योग्य पाइएपछि नियुक्ति दिइएको बताए । ‘उपाध्यक्षज्यूले नै राम्रो काम गर्ने अपरेटर छ भनेकै कारणले उहाँलाई राखिएको हो,’ काप्रीले भने, ‘हामीलाई उहाँको विगतको विषयमा थाहा भएन् ।’
यसअघि उपाध्यक्षको सचिवालयमा नेपाल सरकारका स्थायी कर्मचारीले काम गर्दै आएका थिए । तर, डा. अन्जनी उपाध्यक्ष नियुक्त भएलगतै विजयकुमारलाई ल्याउनकै लागि कार्यकारी परिषद्बाट प्राविधिकको अस्थायी दरबन्दी स्वीकृत गराएका थिए । सोही दरबन्दीमा उनले विजयकुमारलाई मंसिर तेस्रो साताबाट काम गर्ने गरी नियुक्ति दिलाएका हुन् ।
आयोगको वेवसाइटमा कर्मचारी विवरणको ३२ औं नम्बरमा विजयकुमारको नाम कम्प्युटर अपरेटरका रुपमा उल्लेख छ ।
कसरी गएको थियो विजयकुमारको जागिर ?
१ मंसिर २०७६ मा मदिरा सेवन गरेर कार्यलय परिसरमै दुर्व्यवहार गरेको उजुरी परेपछि एनएचआरसीका तत्कालीन अध्यक्ष डा. अन्जनी (अहिलेका आयोगका उपाध्यक्ष)ले नै ४ मंसिरदेखि १७ मंसिरसम्म विजयकुमारलाई निलम्बन गर्नुका साथै दुई महिना (मंसिर र पुस) को तलब रोक्ने निर्णय गरेका थिए ।
त्यतिबेला हेल्थआवाजलाई प्राप्त अधिकृत विजयकुमारको तलब रोक्का तथा निलम्बन पत्रमा परिषद्को कर्मचारी प्रशासन विनियमावली १०.३ बमोजिम निलम्बन गरिएको र सोही विनियमअनुसार दुई महिनाको तलब रोक्का गरिएको उल्लेख थियो । पत्रमा आइन्दा कार्यलय समयमा पुनः यस्ता मर्यादा विपरित कार्य दोहोरिएको पाइएमा विनियमको १०.६ बमोजिम भविष्यमा परिषद्को सेवाको लागि अयोग्य ठहरिने गरी बर्खास्त गर्ने गरी कारवाही हुने चेतावनी समेत दिइएको थियो । विजयकुमारलाई निलम्बन र तलब रोक्का गरेको पत्रमा तत्कालीन समयमा एनएचआरसीका कार्यकारी अध्यक्ष रहेका डा. झा आफैले हस्ताक्षर गरेका थिए ।
त्यतिबेला निलम्बनको कारवाही भोगेका विजयकुमार पुनः एक महिला सहकर्मीमाथि यौन दुर्व्यवहारको आरोप लागेपछि वि.सं. २०७८ चैतमा निलम्बनमा परेका थिए । निलम्बनसँगै एनएचआरसीले उनीमाथि छानविन गर्न स्वतन्त्र छानविन समिति गठन गरेको थियो ।
छानविन समितिले उनले ‘कार्यस्थलमा यौन दुर्व्यवहार’ गरेको प्रतिवेदन दिएको थियो । छानविनबाट समेत दोषी पाइएपछि विजयकुमारलाई एनएचआरसीको वोर्डले विभागीय कारवाही गरेर जागिरबाटै हटाएको थियो ।
एनएचआरसीको आफूलाई जागिरबाट हटाउने निर्णय विरुद्ध उनी प्रशासकीय अदालत गएका थिए । तर, प्रशासकीय अदालतले एनएचआरसीको वोर्डको निर्णयलाई सदर गरिदिएको थियो ।
यो पनि पढ्नुहोस्
