काठमाडौं– वीरगन्जस्थित नारायणी अस्पतालले पहिलो पटक वार्षिकोत्सव मनाएको छ । शनिवार एक सय ३१ औँ स्थापना दिवसका अवसरमा अस्पतालले पहिलो पटक वार्षिकोत्सव मनाएको हो ।
स्वास्थ्य तथा जनसंख्यामन्त्री मोहनबहादुर बस्नेतले अस्पतालको पहिलो वार्षिकोत्सवको उद्घाटन गर्दै ५० शय्याको आकस्मिक भवनसहित एमआरआई मेसिनको समेत उद्घाटन गरे । उक्त समारोहमा बोल्दै स्वास्थ्यमन्त्री बस्नेतले अस्पतालको स्तरोन्नति गर्ने तथा विशिष्ट श्रेणीको अस्पताल बनाउन पहल गरे ।
स्वास्थ्यमन्त्री बस्नेतले उक्त अस्पतालमा आगामी तीन महिनाभित्र मृगौला प्रत्यारोपण सेन्टरको स्थापना गर्ने प्रतिबद्धता जनाए । त्यसैगरी अस्पताललाई चाहिने आवश्यक सामाग्रीहरू उपलब्ध गराउने र जनशक्ति अभाव हुन नदिने समेत उनले बताए ।
अस्पतालले अघिल्लो साताको शनिवारबाट म्याराथन, क्रिकेट, फुटसल, ब्याडमिन्टन, आम रेस्लिङ, तथा रक्तदान कार्यक्रम आयोजना गरेको थियो । वार्षिकोत्सवका अवसरमा १०१ जनाले रक्तदान गरेको अस्पतालका प्रवक्ता डा. उदयनारायण सिंहले बताए ।
नारायणी अस्पतालका निमित्त मेसु डा. चित रञ्जन साहको अध्यक्षता तथा स्वास्थ्यमन्त्री मोहन बहादुर बस्नेतको प्रमुख आतिथ्ययतामा भएको कार्यक्रममा कार्यक्रममा जिल्लाका सङ्घीय संसद् तथा प्रदेश संसद्को सहभागिता रहेको प्रवक्ता सिंहले बताए ।
अस्पतालले हाल ओपिडी, भिडियो एक्स–रे, एक्स–रे, प्रयोगशाला प्रसूति सेवा, गाइनो, सर्जिकल, मेडिकल, छाला, बाल बहिरङ्ग, इएनटी लगायतका सेवा दिँदै आएको छ । औसतमा दैनिक १ हजार ३०० बिरामीले ओपिडी सेवा र वार्षिक दुई लाखको हाराहारीमा बिरामीले लिइरहेको अस्पतालले जनाएको छ ।
