काठमाडौं—चिकित्सा शिक्षा आयोगको कार्यकारी उपाध्यक्षका लागि १० जनाले आवेदन दिएका छन् । उपाध्यक्ष सिफारिस समितिले आवेदन लागि तोकेको शुक्रबार अन्तिम दिनसम्म १० जनाको आवेदन परेको हो ।
आवेदन दिनेहरुमा प्रा.डा. श्रीकृष्ण गिरी, प्रा.डा. पियुष दाहाल, प्रा.डा. अन्जनीकुमार झा, प्रा.डा. संगीता भण्डारी, प्रा.डा. विधाननिधी पौडेल, प्रा.डा. प्रवीण मिश्र, *एशोसियट प्रोफेसर डा. प्रमोद यादव, *प्रा.डा मेनन गोर्खाली , प्रा. डा. विएन यादव र प्रा. डा. सुमन श्रेष्ठ रहेका छन् ।
डा. गिरी अहिले आयोगका कार्यकारी उपाध्यक्ष छन् भने डा. भण्डारी राप्तीकी पूर्व उपकुलपति हुन् , डा. अन्जनीकुमार झा एनएमएका पूर्व अध्यक्ष हुन् । डा. पौडेल सिभिल अस्पताल कार्यकारी निर्देशक, डा. मिश्र पूर्व स्वास्थ्य सचिव हुन् । डा. यादव विपीकै फरेन्सिका प्राध्यापक हुन् । यसैगरी, डा. श्रेष्ठ काठमाडौंका मेडिकल कलेजका निर्देशक र डा. प्रमोद टमा सेन्टरका पूर्व निर्देशक हुन् ।
हालका उपाध्यक्ष डा. गिरीको चार वर्षे कार्यकाल सकिएपछि सरकारले आयोगको नयाँ कार्यकारी उपाध्यक्ष नियुक्तिका लागि प्रक्रिया अगाडि बढाएको थियो । १६ साउनमा बसेको मन्त्रिपरिषद बैठकले उपाध्यक्ष नियुक्तिका लागि तीन सदस्सीय समिति गठन गरेको थियो ।
लोकसेवा आयोगका अध्यक्षको अध्यक्षतामा रहने सिफारिस समितिमा मुख्यसचिव वा मुख्यसचिवले तोकेका प्रधानमन्त्री कार्यालयका एक जना सचिव र चिकित्सा क्षेत्रको प्राध्यापकहरुमध्ये सरकारले एक जना महिला रहने व्यवस्था छ । सरकारले चिकित्सा क्षेत्रको महिना सदस्यमा नेपाली सेना स्वास्थ्य विज्ञान संस्थानकी प्राध्यापक डा. लोचना श्रेष्ठलाई तोकेको छ ।
सिफारिस समितिले २६ साउनमा योग्यता पुगेका व्यक्तिहरुबाट आयोगको उपाध्यक्षका लागि आवेदन माग गरेको थियो । उसले १५ दिनभित्र आवेदन माग गरेको थियो ।
उक्त आवेदनमा चिकित्सा क्षेत्रमा २० वर्ष काम गरेको, चिकित्सा शिक्षाको क्षेत्रमा कम्तिमा १० वर्षको अनुभव भएको हुनुपर्नेलगायतका प्रावधान उल्लेख छन् । आवेदकबाट ४ वर्षे कार्ययोजना पनि माग गरिएको छ ।
आवेदकहरुबाट सिफारिस समितिले तीन जनाको नाम मन्त्रिपरिषद्लाई सिफारिस गर्नेछ । उक्त तीन जनाबाट मन्त्रिपरिषद्ले एक जनालाई आयोगको कार्यकारी उपाध्यक्षमा नियुक्त गर्नेछ ।
*यसअघि दुई वटा नाम अन्यथा परेकाले सच्चाइएको छ । स.
