काठमाडौं—कुवेतको एक बहुप्रतिष्ठित हस्पिटलले ठूलो संख्या विदेशी विशेषज्ञ चिकित्सकहरुका लागि आवेदन माग गरेको छ । नेपालका लागि उक्त हस्पिटलको रोजगार एजेन्टका रुपमा काम गरिरहेको ओमेगा इन्टरनेशनल प्राइभेट लिमिटेडले कुवेतको हस्पिटलमा काम गर्न इच्छुक नेपाली चिकित्सकहरुका लागि आवेदन खुला गरिएको जनाएको छ ।
ओमेगाका अप्रेशन म्यानेजर विनोद थापाले अहिले हस्पिटलले दुई वर्षका लागि ९७५ जना विशेषज्ञ चिकित्सक माग गरेको जानकारी दिए । ‘अहिले ठूलो संख्यामा विशेषज्ञ चिकित्सकको माग भएको छ,’ उनले भने, ‘विशेषज्ञता हासिल गरेपछि तीन वर्ष काम गरेको अनुभव आवश्यक पर्छ ।’ छनोटका प्रक्रियामा भने अनलाइन अन्तर्वार्ता रहेको थापाले जानकारी दिए ।
उनकाअनुसार हस्पिटलले सुरुमा दुई वर्षका लागि कन्ट्याक्ट दिनेछ भने त्यसपछि बस्न मन हुने चिकित्सकहरुले भिसा थपेर अवधि लम्बाउन सक्नेछन् ।
अस्पतालले एनेस्थेसिया डाक्टर १०० जना, आईसीयु कार्डियाक डाक्टर २२५ जना, पेडियाट्रिक डाक्टर १२५ जना, फिजिसियन डाक्टर (इमर्जेन्सी) २०० जना, अब्स्ट्याक्ट तथा गाइनोकोलोजिष्ट डाक्टर १०० जना, अर्थोपेडिक्स डाक्टर १०० जना र रेडियोलोजिष्ट डाक्टर १२५ जना माग गरेको हो ।
उनकाअनुसार प्रतिदिन ८ घण्टाका दरले महिनामा २६ दिन काम गर्नुपर्नेछ । मासिक आधारभूत तलब विधा हेरेर ७ लाख ११ हजारदेखि १२ लाख ७० हजार नेपाली रुपैयाँसम्म हुनेछ ।
सुरुको महिनाको खाना र बस्नको व्यवस्थासमेत अस्पतालले गर्नेछ भने त्यसपछिको महिनाबाट खानाको व्यवस्था भने आफैले गर्नुपर्नेछ । लजिङको सुविधा भने अस्पतालले नै उपलब्ध गराउने उनले जानकारी दिए ।
कुवेत पठाउने खर्चका रुपमा भने एक महिनाको तलब कट्टा गरिनेछ । त्यसबाहेक अन्य कुनै पनि खर्च नलाग्ने थापाले जानकारी दिए ।
वैदेशिक रोजगारमा कामदार पठाउनका लागि वैदेशिक रोजगार विभागबाट अनुमति लिनुपर्ने प्रावधान छ ।
