काठमाडौं—पर्साका धोबीनी गाउँपालिकामा कार्यरत प्रशासन प्रमुखसमेत रहेका स्वास्थ्य संयोजक संजयकुमार यादवलाई कार्यपालिकामा कामभन्दा बढी राजनीतिक गरेको भन्दैं स्वास्थ्य तथा जनसंख्या मन्त्रालय फिर्ता पठाउने निर्णय गरेको पाइएको छ । गाउँपालिका उपाध्यक्ष मंजु देवीको अध्यक्षतामा बसेको गाउँपालिकाको बैठकले यादवलाई संघीय स्वास्थ्य मन्त्रालय फिर्ता गर्ने निर्णय गरेको हो ।
उपाध्यक्ष मंजुसहित ३ जना वडाध्यक्ष, १३ जना सदस्यसहित १७ जनाले हस्ताक्षर गरेर स्वास्थ्य संयोजक यादवलाई गाउँपालिकाबाट फिर्ता गर्ने निर्णय गरेका हुन् । ५ वटा वडा रहेको उक्त गाउँपालिकाका २३ जना कार्यसमिति सदस्य रहेका छन् ।
बहुमत कार्यसमिति सदस्यले यादवलाई बढी राजनीति गरेको र कामकाज सन्तोषजनक नदेखिएर कार्यलयको सेवा प्रवाहमा बाधा आएकाले निजलाई गाउँपालिकाबाट फिर्ता पठाउनका लागि स्वास्थ्य तथा जनसंख्या मन्त्रालयलाई सर्वसम्मत रुपमा पत्र पठाउने निर्णय गरेको उल्लेख छ ।
धोबीनी गाउँपालिकाका अध्यक्ष मदनप्रसाद चौहानले भने गाउँपालिकामा अल्पमत र बहुमतको कुरा हुने बताए । ‘हटाउन र फर्काउने कुरा हामीहरुले पनि गर्न सक्छौं,’ उनले भने, ‘तर, यो कुरा मलाई थाहा छैन ।’
गाउँपालिकाको कार्यपालिकाका १३ जना सदस्य रहेका छन् । जसमध्ये पालिका प्रमुखसहित ३ जना जसपाबाट र उपाध्यक्षसहित १० जना नेपाली कांग्रेसबाट निर्वाचित छन् ।
