विराटनगर—पूर्वी नेपालको सबैभन्दा ठूलो सरकारी अस्पताल कोशीमा जनरल शैय्या मंगलबारदेखि निःशुल्क गरिएको छ । स्वास्थ्य तथा जनसंख्यामन्त्री मोहनबहादुर बस्नेतले संघीय सरकार मातहत रहेको कोशी अस्पतलाको ३३० शैय्या सर्वसाधारणका लागि निःशुल्क गर्ने निर्णय भएको बताएका हुन् ।
मंगलबार कोशी अस्पतालको निरीक्षण गरेपछि संवाददाताहरुसँग कुराकानी गर्दै मन्त्री बस्नेतले कोशी अस्पतालले गरिबका लागि भन्दै जनरल वेड निःशुल्क गरिएको बताए । यसअघि प्रति शैय्या १०० रुपैयाँ शुल्क लिने गरिएको थियो । अबदेखि कोही पनि बिरामीले शैय्याका लागि पैसा तिर्नु नपर्ने मन्त्री बस्नेतले बताए । यसअघि वीर अस्पतालको ७ सय शैय्या निःशुल्क गर्ने निर्णय भएको छ ।
यसरी क्रमसः संघीय मातहतको अस्पतालको जनरल बेड निःशुल्क गरिने मन्त्री बस्नेतलले बताए । ‘यसअघि मैले वीर अस्पतालको ७०० बेड निःशुल्क गर्न निर्देशन दिएको छु, लागु पनि भएको छ । कोशी अस्पतालको पनि जनरल वेड निःशुल्क भएको छ,’ मन्त्री बस्नेतले भने, ‘यहाँ पनि मंगलबारदेखि लागु हुनेछ ।’
शैय्या निःशुल्क गर्दा अस्पताललाई आम्दानी रकम सरकार र आन्तरिक स्रोतबाट व्यवस्थापन गरिने मन्त्री बस्नेतले बताए । मन्त्रीले निर्देशन दिएपछि जनरल शैय्यामा भर्ना भएका बिरामीको मंगलबारदेखि जनरल शैय्या निःशुल्क गरिएको कोशी अस्पतालका मेसु डा. रविराज सिंहले जानकारी दिए ।
‘कोशी अस्पताल गरिब र विपन्न वर्गका लागि भरोसाको केन्द्र हो । एक सय रुपैयाँ तिर्नका लागि उनीहरुलाई सहज हुँदैन,’ मेसु सिंहले भने, ‘अन्य सेवा विस्तार गरेर भए पनि जनरल शैय्या निःशुल्क गर्ने निर्णय भएको हो ।’
जनरल बेड निःशुल्क भएपनि आईसीयु र क्यानको शुल्क भने लाग्नेछ ।
कोशी अस्पताल ३५० शैय्याको अस्पताल हो । कोशीमा दैनिक ओपीडीमा १ हजारदेखि १ हजार पाँच सय जना बिरामी आउने गरेका छन् । काठमाडौं बाहिर वीर अस्पतालपछि कोशी अस्पतालको जनरल शैय्या निःशुल्क गर्ने दोस्रो हस्पिटल हो । कोशीपछि मेची प्रादेशिक अस्पताल निरीक्षण गर्न मन्त्री बस्नेत गएका छन् । मेची प्रादेशिक अस्पतालको जनरल शैय्या निःशुल्क गरिने तयारी गरिएको छ ।
बुधबार चार काठमाडौंका चार अस्पतालको पनि जनरल शैय्या निःशुल्क गरिने तयारी गरिएको मन्त्री बस्नेतले बताए । गंगालाल हृदय रोग केन्द्र, सरुवा रोग केन्द्र, प्रसुती गृह, कान्ति बाल अस्पतालको पनि जनरल शैय्या निःशुल्क गरिने मन्त्री बस्नेतले जानकारी दिए । ‘त्यसको लागि बुधबार विहान ९ बजे बैठक बस्ने भएको छ । त्यसपछि निर्णय गरेर यी अस्पतालको पनि निःशुल्क जनरल वेड घोषणा गरिनेछ,’ उनले भने ।
अस्पतालको गरिव विभिन्न र असहायका बिरामी र नेपालले गरेको संविधानलाई ध्यानमा राखेर निःशुल्क गरिएको उनले बताए ।
