वीरेन्द्रनगर— सन् २०२३ मा नेपाललाई दादुरा रुबेलामुक्त घोषणा गर्ने नेपाल सरकारको लक्ष्य रहेको थियो । सन् २०२३ मा नेपालमा दादुरा रुबेला रोगको अन्त्य गर्ने लक्ष्य राखिएको भएपनि १२ पुस २०७९ मा बाँकेको नेपालगञ्जबाट ‘आउट ब्रेक’ भएको दादुरा संक्रमण हाल १५ जिल्लामा फैलिएको छ ।
पूर्व खोपयुक्त जिल्ला बाँकेमा आउट ब्रेक भएको दादुरा अहिले १५ जिल्लामा फैलिएको छ । कर्णाली प्रदेशको सुर्खेत र कालिकोट जिल्लामा दादुरा तथा रुबेलाका बिरामी भेटिएपछि अहिले ती जिल्लाहरुमा खोप अभियान सञ्चालन गर्ने सरकारले तयारी थालेको छ । नेपाललाई दादुरा तथा रुबेलामुक्त देश बनाउनका लागि सन् २०२६ को लक्ष्य सरकारले राखेको छ ।
अझै पनि नेपालमा १५ वर्षभित्रका ४ प्रतिशत बालबालिकाले खोप लगाउन छुटेको युनिसेफका डा.श्रद्धा पंगेनीले बताइन् । दादुराबाट अहिलेसम्म देशभरमा १५ जिल्लाका झण्डै एक हजार संक्रमित भइसकेका युनिसेफका डा.पंगेनीले बताइन् ।
सुर्खेतमा विशेष अभियान सञ्चालन गरिदै
चालु आर्थिक वर्षमा सुर्खेतका चार पालिकामा ५ जना दादुरा संक्रमित भेटिएका थिए । सुर्खेतमा यही २८ गतेदेखि असार ५ गतेसम्म दादुरा विरुद्धको खोप अभियान सञ्चालन हुने भएको छ । खोप अभियानमा दुई चरणमा सञ्चालन हुनेछ ।
पहिलो चरणमा बराहताल, भेरीगंगा, चिङ्गाड र लेकबेशी नगरपालिकामा खोप अभियान सञ्चालन हुने जनस्वास्थ्य सेवा कार्यालय सुर्खेतले जनाएको छ । त्यस्तै, दोस्रो चरणमा वीरेन्द्रनगर, पञ्चपुरी, चौकुने, गुर्भाकोट र सिम्ता गाउँपालिकामा खोप अभियान सञ्चालन हुने जनस्वास्थ्य प्रमुख गणेशभक्त गौतमले बताए ।
खोप अभियानका लागि जिल्लाभरका ९९ वडामा कुल ५४७ वटा खोप केन्द्र रहनेछन् । खोप केन्द्रहरु विद्यालयमा राखिने छ । करिब साढे दुई सय बालबालिका भएको स्थानमा एउटा खोप केन्द्र रहने छ । दादुरा विरुद्धको खोप १५ वर्षमुनिका बालबालिकालाई दिइन्छ । एउटा खोप केन्द्रमा दुई जना स्वास्थ्यकर्मीसहित चार जना जनशक्ति परिचालन गरिने छ ।
कार्यक्रममा जिल्ला समन्वय समिति सुर्खेतका प्रमुख गंगाराम सुनारले वडाले प्रभावकारी भूमिका खेल्नुपर्ने बताए । ‘अभियानलाई सफल बनाउन सरकारको धेरै लगानी भएको भएको छ,’ उनले भने, ‘गुणस्तरीय र प्रभावकारी समन्वय आवश्यक रहेको छ ।’
खोप अभियान सफल पार्न जिल्लाका निकाय र व्यक्तिले साथ र सहयोग गर्नुपर्ने सुर्खेतका प्रमुख जिल्ला अधिकारी नारायणप्रसाद सापकोटाले बताए । गुणस्तरीय रूपमा बालबालिकाले खोप पाउने वातावरण तयार पार्न स्थानीय तहले साथ दिनुपर्ने उनको भनाइ रहेको थियो ।
खोप अभियानलाई प्रभावकारी बनाउन स्थानीय तह र प्रचारप्रसारमा विशेष ध्यान दिनुपर्ने कर्णाली प्रदेश स्वास्थ सेवा कार्यक्रमका निर्देशक डा.रविन खड्काले बताए । ‘कर्णालीमा केहीदिन अघि मात्र कालिकोटका ३ जना बालबालिकामा दादुराका बिरामी भेटिए छन्,’ उनले भने, ‘बालवालिकालाई अभियानमा समेट्नु आवश्यक रहेको छ ।’
सुर्खेतमा खोप अभियान सञ्चालन भएको खोप अभियानमा युनिसेभ, रेडक्रस र स्थानीय तह सहयोगी रहेका छन् ।
