पोखरा—समुदायको पहलमा स्थापित मध्यबिन्दु सामुदायिक अस्पताल संघीयतापछि वि.सं. २०७५ सालमा प्रदेश मातहत ल्याएर जिल्ला अस्पतालका रुपमा सञ्चालन गरिएको थियो । सुरुदेखि नै ५० शैय्यामा सञ्चालन भएको उक्त अस्पतालमा १५ शैय्यामात्रै स्वीकृत छ ।
अस्पतालको स्तरोन्नती तथा व्यवस्थापनमा सहयोग माग्दै अस्पताल सञ्चालक समितिको टोलीले गण्डकी प्रदेशका मुख्यमन्त्री सुरेन्द्रराज पाण्डेलाई भेटेर ध्यानाकर्षण गराएको छ ।
आइतबार अस्पताल अध्यक्ष बालकृष्ण घिमिरेसहितको टोलीले मुख्यमन्त्रीलाई भेटेर स्तरोन्नती र भौतिक संरचना व्यवस्थापनमा सहयोग मागेको हो । १५ शैय्याको स्वीकृती पाएको अस्पतालमा ५० भन्दा बढी शैय्या सञ्चालनमा भएपनि बिरामीको चाप धान्न कठिन भएकाले १ सय शैय्याको अनुमतिका लागि प्रदेश सरकारसँग अनुरोध गरिएको अध्यक्ष घिमिरेले बताए ।
उक्त अस्पताल क्षयरोग बिरामीको रिफरल सेन्टरसमेत हो । अस्पताल १ सय शैय्या बनाउन, भौतिक संरचना थप्न, डायलाइसिस सेवा विस्तारलगायत माग गरिएकोमा मुख्यमन्त्री पाण्डेले पहल गर्ने प्रतिबद्धता जनाए । अस्पतालमा १ सय ३१ कर्मचारी छन् । जसमध्ये ३१ जनामात्र सरकारी दरबन्दीका हुन् ।
अस्पतालमा गत सातामात्र ४ वटा डायलाइसिस मेसिन जडान गरिएको छ । प्रति महिना पालो कुरेर बसेका बिरामी १ सय हाराहारीमा छन् । मेसिन थप गर्न र सञ्चालनका लागि कावासोती र मध्यबिन्दु नगरपालिकाका साथै हुप्सेकोट गाउँपालिकाले सघाएको अध्यक्ष घिमिरेको भनाइ छ ।
जर्मन संस्था र नेपाल सरकारको संयुक्त लगानीमा अहिले निर्माणधीन भवनका लागि बजेटसमेत माग गरिएको छ । अस्पतालमा सर्पले डसेका बिरामी धेरै आउने भएकाले पूर्वाधार व्यवस्थापनमा अस्पतालका मेडिकल सुपरिटेन्डन्ट डा. जितेन्द्र कँडेलले बताए ।
