काठमाडौं—महिला स्वास्थ्य स्वयंसेविकाहरुले आफूले पाउँदै आएको स्वास्थ्य स्वयंसेविका भत्तासहितका अन्य सुविधा थप गर्न माग गरेका छन् । सेवा सुविधा थप हुनुपर्ने माग राख्दै महिला स्वास्थ्य स्वंसेविकाहरुले प्रधानमन्त्रीलाई भेटेर ज्ञापनपत्र बुझाउने तयारी गरेका छन् ।
उनीहरुले यसअघि सबै स्थानीय तह, प्रदेश सरकार, केन्द्रीय स्वास्थ्य मन्त्रालयलाई ज्ञापन पत्र बुझाइसकेका छन् । राष्ट्रिय महिला सामुदायिक स्वास्थ्य स्वयंसेविका संघ नेपालको तर्फबाट तयार पारिएको ज्ञापन पत्रमा ११ बुँदे माग प्रस्तुत गरिएको छ ।
सो मागमा मासिक रुपमा १० हजार रुपैयाँ प्रोत्साहन भत्ता पाउनुपर्ने, यातायात खर्च एकमुष्ट वर्षमा २४ हजार रुपैयाँ पाउनुपर्ने, संचार खर्च वर्षमा एकमुष्ट १० हजार रुपैयाँ, आमा समूहको मासिक बैठक मासिक ७ हजार रुपैयाँ, खोपहरु संचालन भएको दिन स्वयंसेविकाहरुलाई १ हजार भत्ता हुनुपर्ने माग अगाडि सारेका छन् ।
त्यसैगरी, आवत जावत यातायातमा ५० प्रतिशत छुटको व्यवस्था मिलाउनुपर्ने, महिलाहरुको लागि महिला पहिला कार्यक्रमको व्यवस्था गरिदिनुपर्ने, स्वयंसेवी स्वास्थ्यकर्मीलाई निःशुल्क स्वास्थ्य बिमा गराउनुपर्ने माग छन् ।
६० वर्ष कटेका महिलालाई स्वास्थ्य स्वयंसेविकाहरुलाई सम्मान स्वरुप एकमुष्ट १ लाख रुपैयाँ उपलब्ध गराउनुपर्ने, शैक्षिक योग्यताअनुसार तलबको व्यवस्था गर्नुपर्ने र आमा समूहबाट छनौट भएका महिला स्वास्थ्य स्वयंसेविकाहरुलाई स्थानीय तह वा प्रदेश सरकारले नियुक्ति दिने व्यवस्था मिलाउने माग राखेका छन् ।
