काठमाडौं—तत्कालीन प्रधानमन्त्री केपी शर्मा ओली नेतृत्वको सरकारले तामझामका साथ अगाडि बढाएको सामाजिक सुरक्षा कोष लोकप्रिय बन्दैं गएको पाइएको छ । योगदानमा आधारित सुरक्षा योजना कार्यविधी, २०७५ अनुसार कोषले औषधी उपचार, स्वास्थ्य तथा मातृत्व सुरक्षा योजना पनि अगाडि बढाइरहेको छ ।
जसले कोषमा आवद्ध रहेका योगदानकर्ताहरुलाई उपचार खर्च उपलब्ध गराउँदैं आएको छ । महालेखा परीक्षकको ६० औं प्रतिवेदनमा उल्लेख भएअनुसार कोषले यस वर्ष औषधि उपचार, स्वास्थ्य तथा मातृत्व सुरक्षा योजनातर्फ १७ करोड ५० लाख ३९ हजार रुपैयाँ भुक्तानी गरेको छ । कोषले यो योजनातर्फ यही वर्ष ३९ करोड २४ लाख ८ हजार रुपैयाँ संकलन गरेको थियो ।
कोषमा आवद्ध रोजगारदाता र कर्मचारीले कोषमा सूचीकृत अस्पतालहरुमा उपचार गराउँदा उपचार बापत लागेको रकमको जम्मा २० प्रतिशत मात्र तिर्नुपर्छ । अन्य रकम भने सामाजिक कोषले व्यहोर्दै आएको छ । कोषले औषधि उपचार, स्वास्थ्य तथा मातृत्व सुरक्षा योजनातर्फ संकलन गरेको रकम र भुक्तानी रकम हेर्दा यो योजना पनि लोकप्रिय बन्दैं गएको देखिन्छ ।
कोषले दुर्घटना तथा अशक्तता सुरक्षा योजना, आश्रित परिवार सुरक्षा योजना, वृद्धवृद्धा सुरक्षा योजनाजस्ता सामाजिक सुरक्षाका कार्यक्रम अगाडि बढाइरहेको छ । दुर्घटना तथा अशक्तता सुरक्षा योजनाअन्तर्गत ५४ करोड ९३ लाख ७१ हजार रुपैयाँ संकलन गरेकोमा १ करोड ८७ लाख ८६ हजार दावी भुक्तानी गरेको छ । आश्रित परिवार सुरक्षा योजनाअन्तर्गत वर्षमा १० करोड ५९ लाख ४७ हजार संकलन भएकोमा ३ करोड २३ लाख १४ हजार दावी भुक्तानी दिएको छ ।
वृद्धवस्था सुरक्षा योजनाअन्तर्गत ११ अर्ब ५७ करोड ४७ लाख २२ हजार संकलन भएकोमा १ अर्ब २७ करोड ५५ लाख ५२ हजार दावी भुक्तानी गरेको महालेखा प्रतिवेदनमा उल्लेख छ । महालेखाले दावी भुक्तानीलाई सरल बनाउन पनि कोषलाई सुझाव दिएको छ ।
