धनगढी—कैलालीको गोदावरी नगरपालिका मातहत रहेको मालाखेती अस्पतालमा पहिलो पटक शल्यक्रिया सेवा सुरु भएको छ । बुधबार स्थापनाको वर्षौपछि अस्पतालमा पहिलो पटक सुत्केरीको शल्यक्रिया गरेर सेवा सुरु गरिएको हो ।
अस्पतालले गोदावरी नगरपालिका–१२ की सानु रावलको शल्यक्रिया गरेको हो । सुत्केरी व्यथा लागेर अस्पताल पुगेकी रावलको शल्यक्रिया गर्नुपर्ने स्थिती देखिएपछि अस्पतालको टिमले बाहिर रेफर नगरेर मालाखेतीमै शल्यक्रिया गरेको हो ।
मालाखेती अस्पतालका अनुसार अस्पतालका डा. अनवेश कोइरालाको टिमले रावलको शल्यक्रिया गरी शिशुलाई सुरक्षित जन्म दिएको छ । कोइरालासँगै मेट्रोन यसोदा ढकाल, हेमन्ती अवस्थी, मञ्जु ऐर, सञ्जय फुलारा तथा एनेस्थेसिया सञ्जय सिहंको टिम रावलको शल्यक्रिया संलग्न रहेको थियो ।
अस्पताल व्यवस्थापन समितिका अध्यक्ष डा. नरबहादुर मौनीले अस्पतालबाट अब अस्पतालले निरन्तर शल्यक्रिया सेवा दिने बताए । विगतमा सामान्य शल्यक्रिया गर्नुपर्ने केसहरु नै बाहिर रेफर गर्नुपर्ने स्थितीको अब अन्त्य भएको उनको भनाइ छ ।
अस्पतालमा शल्यक्रिया सेवा सुचारु गर्नका लागि केही दिन अगाडि मात्रै अप्रेसन थियटर निर्माण गरिएको थियो । अप्रेसन थियटर हाम्रो गोदावरी अभियानले कोभिड–१९ महामारीका बेला संकलन गरेको रकमले निर्माण गरिएको अध्यक्ष मौनीले बताए । उनले अप्रेसन थियटरका उपकरण अझै अपुग रहेकाले उक्त उपकरण अभियानमार्फत केही दिन भित्रमा उपलब्ध हुने बताए ।
पछिल्लो समय मालाखेती अस्पतालले सेवाहरुमा सुधार र विस्तार गर्दै गएको छ । बन्द रहेको इमर्जेन्सी सेवा सुरु भएको छ भने हाल अस्पतालले बेड भर्नासमेत थालनी गरेको छ । जसका कारण पछिल्लो समय अस्पतालमा बिरामीको चाप पनि बढ्न थालेको छ ।
