विराटनगर—चिकित्सकको लापरवाहीले बिरामीको मृत्यु भएको आरोप लगाउँदै विराटनगरस्थित विराटनगर सिटी अस्पताल तनावग्रस्त बनेको छ । मोरङको जहदा गाँउपालिका–४ की ३९ वर्षीया सन्जु मेहताको शल्यक्रियाको क्रममा मृत्यु भएपछि अस्पताल सोमबार दिनभरी तनावग्रस्त बनेको हो ।
मिर्गौलामा पथरी रहेकाले शल्यक्रियाको लागि उनी आइतबार अस्पताल आएकी थिइन् । शल्यक्रियाको क्रममा उनको आइतबार मृत्यु भएको थियो ।
मृतकका आफन्तले शल्यक्रिया गर्दा चिकित्सकले गम्भीर लापरबाही गरेको भन्दै बिरामीका आफन्तहरुले हस्पिटल र चिकित्सकलाई कारवाहीको माग राख्दैं नाराबाजी गरे । ‘मृतक मेहता बिहान १० बजे सिटी अस्पतालमा चेकजाँचका लागि आउनुभएको थियो । मिर्गौलामा पथरी रहेकाले त्यसैको उपचारका लागि सिटी अस्पताल आउनुभएको थियो । चिकित्सकले शल्यक्रिया गर्नुपर्ने सल्लाह दिनुभयो ।
त्यहीअनुसार गर्न हामीले सझुाव दियौं,’ मृतकका देवर पर्ने विभाष सिंहले भने, ‘चिकित्सकको लापरवाहीले भाउजुको मृत्यु भएको छ ।’ लापरवाही गर्ने चिकित्सकलाई कारावहीको दायरामा ल्याउनुपर्ने उनले बताए ।
‘डाक्टरले अप्रेशन गर्नु भन्नुभएको रहेछ, बिरामीसँग पैसा थिएन् । डाक्टरले केही दिन पछाडि पैसा दिँदा हुन्छ । भनेर अप्रेशन गर्न स्वीकार गर्नुभएको रहेछ,’ उनले थपे ।
केही समयपछि शल्यक्रिया गरेको पैसा दिँदा हुने अस्पतालका सर्जन डा. सुनिल यादवको भनाइअनुसार मृतक मेहता शल्यक्रिया गर्न तयार भएको बताउँदैं उनका आफन्तले राति ८ बजे शल्यक्रिया विभागमा लगिएको र दुई घण्टापछि मात्रै मृतक मेहताको मुटुको धड्कन नभएको चिकित्सकले जानकारी दिएको बताए ।
‘१२ बजे राति बिरामीको कुरुवालाई बचाउने कोशिस गर्दैछौं भनेर डाक्टरले भने,’ उनले सुनाए । तर, चिकित्सकले आश्वासन दिएको आधा घण्टापछि शवलाई बाहिर ल्याएर एम्बुलेन्समा राखिदिएको उनले बताए ।
बिरामीको मान्छेले शव बुझ्न नमानेपछि डा. सुनिल यादव भने घटनास्थलबाट बाहिरिएको उनीहरुको आरोप छ । शव रातैभर एम्बुलेन्समा राखेर अस्पतालको प्रवेशद्धार रात कटाएको बताउने उनीहरुको आफन्त अझैसम्म शल्यक्रियाको नेतृत्व गर्ने डा. यादव नआएको बिरामीको आफन्तले बताए ।अस्पताल प्रशासनलाई घटनाबारे बुझ्न खोज्दा अस्पताल प्रशासन सम्पर्कमा आएनन् ।
