काठमाडौं—नेपाल क्यान्सर हस्पिटलले क्यान्सर दिवसको अवसरमा आशाको लागि ज्योति भन्दैं दीप प्रज्वलन गरेको छ । शुक्रबार साँझ ललितपुर महानगरपालिका प्राणंगणमा दिप प्रज्वलन गरेको हो ।
दीप प्रज्वलन कार्यक्रममा बोल्दैं क्यान्सर सर्भाइभर सुष्मा महर्जनले क्यान्सर हुँदैंमा डराउनु नपर्ने बताइन् । ‘क्यान्सर हुँदैमा डराउनु पर्दैन्,’ उनले भनिन्, ‘समयमै पत्ता लागेर उपचार गरेमा निको हुन्छ । म क्यान्सर ठीक हुन्छ भन्ने कुराको ज्वलन्त उदाहरण हुँ ।’
वेष्ट क्यान्सरमुक्त भएकी उनी अहिले पाठेघरको क्यान्सरको उपचार गराइरहेकी छन् ।
यस्तै, अर्की क्यान्सर सर्भाइभर कोमल शाक्यले सुरुमा आफूलाई क्यान्सर भन्दा निकै डर लागेको अनुभव सुनाइन् । ‘सुरुमा क्यान्सरभन्दा डर लागेको थियो । बेलैमा पत्ता लागेकाले निको भयो,’ शाक्यले भनिन्, ‘अहिले सामान्य जीवन बिताइरहेकी छु । समयमा उपचार गर्दा ठीक हुन्छ ।’
नेपाल क्यान्सर सहयोग समूहका गणेशभक्त श्रेष्ठले विश्वमा क्यान्सर भयावह रुपमा फैलिरहेकाले जनचेतना अत्यावश्वक भएको बताए । ‘मेरो व्यक्तिगत विचारमा मानिस प्रकृतिबाट टाढा हुँदा यस्ता रोगहरु लाग्दा रहेछन्,’ उनले भने, ‘क्यान्सर सुरुवातमै थाहा हुँदा निको हुने सम्भावना ८०—८५ प्रतिशत हुन्छ । तर, पछि थाहा हुँदा ३० प्रतिशत मात्रै निको हुने सम्भावना रहन्छ ।’ त्यसका लागि उनले वार्षिक रुपमा स्वास्थ्य परीक्षण गर्न आग्रह गरे ।
नेपाल क्यान्सर अस्पतालका कार्यकारी निर्देशक डा. सुदिप श्रेष्ठले क्यान्सर विकसित देशमा पनि रहेको र नेपालजस्ता देशहरुमा त भयावह अवस्थामा रहेको बताए । ‘त्यसकारण हाम्रो जस्ता देशहरुमा प्रिभेन्टीभ केयर अत्यावश्यक भइसकेको छ । हामीले यसविरुद्ध जनचेतनाका कामहरु बढाउनुपर्छ,’ डा. श्रेष्ठले भने । डा. श्रेष्ठले क्यान्सर रोग लागेका धनी गरिब सबैले एकै प्रकारको उपचार पाउनुपर्नेमा समेत जोड दिए । उनले त्यसका लागि हामी सबै मिलेर केही न केही गर्नुपर्ने बताए ।
उक्त दीप प्रज्वलन कार्यक्रमको आयोजना नेपाल क्यान्सर हस्पिटलसँगै नेपाल क्यान्सर सपोर्ट ग्रुप रहेको थियो ।
