जाडो मौसम धेरै प्रकारका मौसमी फलफूल र तरकारीहरूको लागि परिचित छ, जसले हाम्रो शरीरलाई विशेष फाइदा पुर्याउँछ। स्वास्थ्य विज्ञहरूले सङ्क्रामक रोगहरूको विकासको जोखिम कम गर्न र प्रतिरक्षा प्रणाली बढाउन आहारमा भिटामिन–सी युक्त खानेकुराहरू बढाउन सुझाव दिन्छन्।
यसका लागि जाडोमा प्रशस्त मात्रामा पाइने सुन्तला तपाईँका लागि निकै फाइदाजनक हुनसक्छ ।
सुन्तलालाई भिटामिन–सीको उत्कृष्ट स्रोत मानिन्छ, सामान्यतया मध्यम आकारको सुन्तलाले यस भिटामिनको दैनिक आवश्यकताको ९० प्रतिशत पूरा गर्न सक्छ।
अन्वेषकहरूले पत्ता लगाए कि सुन्तलामा भिटामिन–सीका साथै प्रोटीन, फाइबर, फोलेट, पोटासियम जस्ता अन्य आवश्यक पोषक तत्त्वहरू पनि प्रशस्त हुन्छन्, जुन हाम्रो शरीरलाई नियमित रूपमा चाहिन्छ। यसमा फाइबरको मात्रा हुने भएकाले पाचन क्रियालाई ठिक राख्न पनि फाइदाजनक पाइन्छ ।
सुन्तला तपाईँको लागि कोलेस्ट्रोल घटाउन, हृदय रोगको जोखिमबाट बचाउन र रोग प्रतिरोधात्मक क्षमता बढाउनमा पनि फाइदाजनक हुन्छ । सुन्तलाको सेवन सबैका लागि फाइदाजनक हुने भए पनि मधुमेहका बिरामीले चिकित्सकको सल्लाहमा मात्रै सुन्तलाको सेवन गर्नुपर्छ ।
सुन्तलाको सेवन धेरै लाभदायक छ
सुन्तला समग्र स्वास्थ्यका लागि विशेष फाइदाजनक रहेको पाइएको छ । अध्ययनका अनुसार १२० ग्राम सुन्तलाले तपाईँको दैनिक भिटामिन–सी आवश्यकताको ९२% पूरा गर्न सक्छ। भिटामिन–सीले प्रतिरक्षा प्रणाली, कोलाजेन, आइरनको अवशोषण बढाउन मद्दत गर्छ। यसका साथै यो फलमा फोलेट पनि प्रशस्त मात्रामा पाइन्छ जुन मेटाबोलिजम, भ्रूण र प्लेसेन्टल विकासका साथै शरीरलाई ऊर्जा प्रदान गर्न आवश्यक हुन्छ।
छालाको लागि सुन्तलाको फाइदा
एउटा अध्ययनले ताजा सुन्तलाको जुस पिउनाले छालाको क्यारोटीनोइडको स्तर बढाउन मद्दत गर्छ। लगभग सबै सिट्रस फलहरूमा क्यारोटिनोइड एन्टिअक्सिडेन्ट उच्च मात्रामा पाइन्छ। यसले छालाको रङ्ग निखार्छ र यससँग सम्बन्धित रोगहरूको जोखिम पनि कम गर्छ। सुन्तलामा बीटा–क्रिप्टोक्सान्थिन नामक एन्टिअक्सिडेन्ट पनि हुन्छ जसले कोषहरूलाई अक्सिडेटिभ क्षतिबाट जोगाउँछ, जसले गर्दा क्यान्सर जस्ता रोगहरूको जोखिम कम हुन्छ।
मुटु रोगमा फाइदाजनक हुन्छ
मुटुसम्बन्धी रोगहरू अहिले अकाल मृत्युको सबैभन्दा सामान्य कारणहरू हुन्। युवाहरूमा समेत यसको जोखिम तीव्र गतिमा बढिरहेको छ । सुन्तलामा भिटामिन सी, फ्लेभोनोइड्स, र क्यारोटिनोइड्स सहित अन्य धेरै पोषक तत्त्वहरू हुन्छन्, जुन हृदय स्वास्थ्यलाई बढावा दिन र हृदय रोगको जोखिम कम गर्न मद्दत गर्न अध्ययनहरूमा देखाइएको छ। यसको प्रयोगले कोलेस्ट्रोलको स्तरलाई पनि नियन्त्रण गर्न सकिन्छ, जुन मुटु रोगको प्रमुख कारक मानिन्छ।
सुन्तलाले पुरानो रोगबाट पनि बचाउँछ
मुटुको स्वास्थ्यमा सुधारका साथसाथै सुन्तला वा अन्य सिट्रस फलफूलको नियमित सेवनले केही प्रकारको क्यान्सर र मधुमेहलगायत अन्य दीर्घकालीन स्वास्थ्य अवस्थाको जोखिम कम गर्न फाइदाजनक हुन सक्छ। अध्ययनले देखाएको छ कि सिट्रस फलको उच्च खपतले फोक्सो, मुख, पेटको क्यान्सर जस्ता धेरै प्रकारको क्यान्सरको जोखिम कम गर्न सक्छ। यो फलले तपाईँको रोग प्रतिरोधात्मक क्षमता बढाउँछ, जसले सङ्क्रमणको जोखिम पनि कम गर्छ ।
