कार्डियोलोजिष्ट डा. सुमन अधिकारी पोखरा स्वास्थ्य विज्ञान प्रतिष्ठान पश्चिमाञ्चल क्षेत्रीय अस्पताल पोखरामा छात्रवृत्ति करारअन्तर्गत कार्यरत छन् । विद्यालय तहबाट नै पढाइमा अब्बल डा. सुमन पछिल्लो समय विशिष्टीकृत विज्ञता हासिल गरेका चिकित्सकका रुपमा ७ महिनादेखि उक्त अस्पतालमा स्वास्थ्य सेवा दिइरहेका छन् ।
विद्यालय तह पूरा गर्ने समयसम्म डाक्टर बन्छु भन्ने योजना नै नभएका उनी अध्ययन अघि बढाए र डिएम पूरा गरे । बुबा बलराम अधिकारी र आमा देवी अधिकारीका जेष्ठ सन्तान सुमनले बाल्यकाल सामान्य रुपमा बितेको थियो । कास्की लेखनाथका स्थायी निवासी उनका बुबा खानेपानीसम्बन्धी हार्डवेयरको व्यवसाय गर्थे, सुमनलाई आधारभूत आवश्यकता पूरा गर्न कुनै समस्या थिएन ।
वीरभद्र बोर्डिङ स्कुलबाट अध्ययन थालेका उनले पोखरा—३० को लक्ष्मी आदर्श माविबाट माध्यमिक तह पूरा गरे । सधैं प्रथम भएका अधिकारीले वि.सं. २०५८ को एसएलसीमा विद्यालयमै रेकर्ड कायम गर्ने नतिजा ल्याए । एसओस हर्मन माइनर स्कुलबाट कक्षा १२ पास गरे । प्लस टु मा बायोलोजी रोजेका उनले गणित समूहमा पनि परीक्षा दिए । दुवैतर्फ नतिजा उत्कृष्ट आयो ।
एमबीबीएस तयारीका लागि उनले पोखरा छाडे । एमबीबीएस तयारीका लागि काठमाडौं पुगेका उनले मेरिट लिस्टमा तेस्रो नम्बरमा नाम निकाले । अध्ययनका लागि भने उनले पोखराको मणिपाल शिक्षण अस्पताल रोजे । त्यतिबेला धेरैको रोजाइमा मणिपाल नै पथ्र्याे । एमबीबीएसपछि इन्टार्नसीप मणिपालमै गरेका उनले २ वर्ष गोरखा जिल्ला अस्पतालमा मेडिकल अधिकृतका रुपमा काम गरे । जुन एमबीबीएस छात्रवृत्तिमा अध्ययन सकेपछि गर्नैपर्ने बोन्ड सर्विस थियो ।
एमडी अध्ययनको तयारीमा लागेका अधिकारीले चिकित्सा विज्ञान राष्ट्रिय प्रतिष्ठान (न्याम्स) वीर अस्पताल इन्टरनल मेडिसिन र त्रिवि चिकित्साशास्त्र अध्ययन संस्थान (आईओएम)त्रिवि शिक्षण अस्पतालमा सर्जरीतर्फ नाम निकाल्न सफल भए । त्रिवि छाडेर अधिकारीले इन्टरनल मेडिसिन अध्ययनका लागि न्याम्स रोजे । त्यहीबाट उनले ३ वर्ष खर्चिएर इन्टरनल मेडिसिमा एमडी गरे । त्यसपछि उनले १ वर्ष प्राइभेट क्लिनिकमा सेवा दिए ।
डा. सुमन अध्ययनलाई अझै अघि बढाउन चाहन्थे । प्रयासस्वरुप छात्रवृत्तिमा डिएम कार्डियोलोजी अध्ययनका लागि त्रिवि चिकित्साशास्त्र अध्ययन संस्थान (आईओएम)मा मेरिटको तेस्रो नम्बरमै नाम निकाले । संयोग नै मान्नुपर्छ उनले तेस्रो पटक पनि मेरिटको तेस्रो नम्बरमा नाम निकालेका हुन् ।
मनमोहन कार्डियोथोरासिक भास्कुलर एण्ड ट्रान्सप्लान्ट सेन्टरमा प्रा.डा. रत्नमणि गजुरेल, प्रा.डा. अरुण सायमी, प्रा.डा. चन्द्रमणि पौडेल, प्रा.डा. भगवान कोइराला, डा. अनिल भट्टराईलगायतको गाइडेन्समा ३ वर्षे कोर्स पूरा गरे । एमडी मेडिसिन र डिएम कार्डियोलोजीमा डिस्टिङ्सन ल्याएका उनले एमबीबीएस अध्ययन गर्दा एनाटोमी, फिजियोलोजी, कम्युनिटी मेडिसिन, सर्जरीलगायत विषयमा गोल्ड मेडल प्राप्त गरेका थिए ।
छात्रवृत्तिमा डिएम पूरा गरेपछि डा. अधिकारी अहिले सरकारी नियमानुसार २ वर्षे करारमा पश्चिमाञ्चल क्षेत्रीय अस्पताल पोखरा आएका हुन् । काठमाडौंका अस्पतालमा स्पेसियालिली चेकजाँच गरेका बिरामीको फ्लोअप गर्नुपर्ने भएमा काठमाडौंकै डाक्टरको सिफारिसमा डा. अधिकारी फ्लोअप रिपोर्ट हेर्छन् । आवश्यक परे काठमाडौंका डाक्टरलाई ब्रिफिङसमेत गर्छन् ।
अध्ययनकै क्रममा भेटिएकी सहपाठी डा. सुनिता घिमिरेसँग उनले लगनगाँठो कसे । अध्ययनकै क्रममा अंकुराएको प्रेमलाई उनले परिवर्तन गरी जीवनरथ अघि बढाए । डा. सुनिता पनि पश्चिमाञ्चल क्षेत्रीय अस्पतालमा बालरोग विशेषज्ञका रुपमा कार्यरत छन् । उनकी छोरी छन् । दुवै जना एउटै फिल्डमा भएकाले समय व्यवस्थापन र आपसी समझदारीमा सहज छ उनीहरुलाई ।
कोभिड—१९ महामारीका निरन्तर बिरामी सेवामा सक्रिय रहे । ‘त्यो बेला लामो समय परिवारलाई भेटघाट गर्न नपाउँदा नियास्रो लाग्थ्यो,’ उनले सुनाए, ‘कहिलेकाही पारिवारिक भेटघाटमा जान पाए हुन्थ्यो भन्ने लागिरहन्थ्यो ।’ अहिले भने सेवा क्षेत्र र परिवारलाई समय दिन अप्ठ्यारो परेको छैन ।
विशेषज्ञ डा. अधिकारीको विद्यालय समयसम्म फुटबलमा ज्यादै रुचि थियो । उनले पहिलो रुचि पकडन सकेको भए, विदेशमा जस्तो छात्रवृत्तिलगायत सुविधा भएको भए, खेल क्षेत्रको विकास राम्रो भएको भए उनी अहिले फुटबलर हुन्थे । पढाइमा उत्कृष्ट विद्यार्थी डाक्टर, इन्जिनियर बन्नुपर्छ भन्ने समाजकै सोचका कारण उनी डाक्टर बन्ने बाटोमा अघि बढे ।
डाक्टर बन्ने रेस पूरा गरेका डा. सुमनलाई नेपालको अहिलेको सापेक्षतामा एउटा मात्रै संस्थामा रहेर उत्कृष्ट जीवनयापन गर्न असम्भव लाग्छ । योग्यता हासिल गरे पनि सरकारी अस्पतालका स्थायी डाक्टर बन्ने वा निजी अस्पतालमा सेवा दिएर बस्ने भन्ने अन्योलमा छन्—डा. अधिकारी । पश्चिमाञ्चल क्षेत्रीय अस्पतालमा करिब आधा वर्ष बिताएका उनलाई यो कुराको डिसिजन गर्न करिब डेढ वर्ष अझै कुर्नुपर्नेछ ।
लोकसेवा आयोगबाट नाम निकालेर स्थायी भएर सरकारी अस्पताल उनको पहिलो रोजाइ हो । छात्रवृत्ति सेवाको करिब डेढ वर्ष उनी त्यसको प्रतीक्षामा छन् । अहिलेसम्म विदेश रोजाइमा परेको छैन । अहिले लोकसेवा आयोगले आवश्यक मात्रामा विज्ञापन नगरेको र विज्ञापन गरेकोमा पनि एउटा पनि खुला कोटा नभएपछि प्राइभेट अर्काे विकल्प हुन पुगेको छ ।
पहिले डाक्टरको कमी र बिरामीमा बुझाइसमेत कमी थियो भने रोगबारे सञ्चारमाध्यमबाट समेत अहिले बिरामीले पनि धेरै कुरा बुझेकाले चिकित्सक थप सजग हुनुपर्ने डा. सुमनको बुझाइ छ । ‘पोखरामा सुविधासम्पन्न कार्डियो सेन्टर स्थापना होस् र कार्डियोलोजिस्ट एकजुट भएर काम गर्न सकियोस् भन्ने चाहना छ,’ उनले भने । उनीसँगै पश्चिमाञ्चल क्षेत्रीय अस्पतालमा कार्यरत छन्—डिएम गरेका कार्डियोलोजिस्ट डा.विश्व बराल र थप २ डाक्टर । डा. सुमन प्रदेशमै कार्डियाक सेन्टर (मुटु अस्पताल) बनाउन सके हार्ट अट्याक समस्याबाट ज्यान जाने जोखिम कम गर्न सकिने उनको बताउँछन् । ‘टिम इफोर्ट नभएसम्म यो असम्भव छ,’ उनले भने । पश्चिमाञ्चल क्षेत्रीय अस्पताल पोखरामा एन्जियोग्राफी सेवा दिन डिएम गरेका चिकित्सकहरुको सक्रिय छन् । छिट्टै एन्जियोप्लाष्टी सेवा सुरु गर्न सकिनेमा उनी विश्वस्त छन् ।
