भारतमा एउटा माटोको भाडोमा जीवितै पुरिएको अवस्थामा भेटिएकी एक बालिकाको स्वास्थ्य अवस्था जटिल बनेको छ । उत्तरी भारतको बेरिल्ले जिल्लाको एउटा गाँउको खाल्डोभित्र राखिएको माटोको भाडोबाट जीवितै उद्दार गरिएकी बालिकाको स्वास्थ्य अवस्था गम्भीर रहेको उनको उपचारमा संलग्न चिकित्सकले बताएका हुन् । ‘उनको अवस्था स्थिर र गम्भीर छ,’ बालिकाको उपचारमा संलग्न बालचिकित्सक रबि खन्नाले भने ।
छोरी जन्मेपछि अभिभावकले माटोको भाडोमा पुरेर फालेको अनुमान प्रहरीले गरेको छ । ठूलो जनसंख्या भएको देश भारतमा लैगिक विभेद ब्याप्त देखिन्छ । महिलालाई सामाजिक रुपमा नै बिभेद गरिन्छ र गरिब समुदयामा छोरीलाई आर्थिक भारको रुपमा लिइन्छ । बालिकालाई अभिभावकले नै पुरेको हुन सक्ने प्रहरी अधिकारी अभिनन्दन सिंहले बताए । शिशुको दाबी गर्न कोही पनि नआएको उनले जानाकारी दिए ।
मृत अवस्थामा जन्मिएको एक बालिकालाई बिहीबार गाड्न लैजाने क्रममा एक गाँउलेले माटोको भाडोभित्र बालिकालाई देखेका थिए । ‘३ फिट गहिरो खाडल खन्दा बेल्चा माटोको भाडोमा ठोकिएको थियो, भाडोभित्र बच्चा रोइरहेकी थिइन । भाडो बाहिर निकाल्दा बालिका थिइन । ’ सिंहले भने ।
बालिका पाल्ने जिम्मा भाजपाका स्थानीय नेता राजेश कुमार मिश्रले लिएका छन् । तस्बिरः एजेन्सी
बालिकालाई स्थानीय सरकारी अस्पतालको शिशुवार्डमा भर्ना गरिएको थियो । ‘अस्पताल ल्याउदा उनी एक साताकी हुनुपर्छ,’ अस्पतालका चिकित्सक डा. सौरभ अन्जनले भनिन् । उनको तौल केबल १ दशमलब १ केजी भएकोले समय नपुगी जन्मिएको चिकित्सकहरुले बताएका छन् । शिशु फेला पर्दा उनको तापक्रम ३५ डिगी थियो । ३६ दशमलब ५ डिग्रीलाई सामान्य तापक्रम मानिन्छ । उनको सुगरको तह ३५ थियो । ‘उनी दुब्ली र निकै कमजोर थिइन । हामीले उनलाई तत्कालै अक्सिजन दिएर हाइपोथर्मियाको उपचार गर्यौ,’ उनले भनिन् ।
पुरिएको बच्चा कतिसमयपछि उद्दार गर्दा बाँच्छन भन्ने विषयमा विज्ञहरुका आआफ्ना अनुमान छन् । डा. अन्जानले बालिका उद्दार हुनुभन्दा तीनदेखि चार घन्टाअघि पुरिएको हुन सक्ने बताइन ।
यसैबीच, शिशुलाई पुर्ने ‘अज्ञात व्यक्ति’ बिरुद्ध प्रहरीले उजुरी गरेको छ । प्रहरीले शिशुको अभिभावकको पनि खोजी कार्य तीब्र पारेको जनाएको छ । शिशुको पाल्ने जिम्मा स्थानीय भाजपा नेताले लिएका छन् ।
