पोखरा–गोरखा जिल्ला अस्पतालमा हेमोडायलाइसीस सेवा सुरु भएको छ । गण्डकी प्रदेश स्वास्थ्य तथा जनसंख्या मन्त्री मधुमाया गुरुङ अधिकारीले सेवा शुभारम्भ गरेकी हुन् ।
गण्डकी प्रदेश सरकारले २ वर्षअघि नै ५ वटा डायलाइसीस मेसिन उपलब्ध गराएको भएपनि भौतिक संरचना तथा दक्ष जनशक्ति व्यवस्थापन नहुँदा सेवा सञ्चालनमा आउन सकेको थिएन । गोरखा ५० शैय्या क्षमताको अस्पताल हो ।
१ महिनाअघि सेवा सुरु भएको भएपनि हालै औपचारिक उद्घाटन गरिएको हो । हेमोडायलाइसीस सेवा सञ्चालनका लागि अहिले तालिमप्राप्त जनशक्ति ३ जना नर्सिङ स्टाफ रहेको अस्पतालका सूचना अधिकारी कृष्णप्रसाद ढकालले जानकारी दिए । उनका अनुसार उक्त सेवाका लागि चाहिने जति जनशक्ति छैन । ५ वटा बेडमा सेवा दिन कम्तीमा पाँच जना नर्सिङ स्टाफ आवश्यक हुन्छ ।
‘२ वर्षअघि नै आएको हो । हामीसँग भवन पनि थिएन । मेसिन इन्स्ट्रल गर्ने ठाउँ पनि थिएन् । जनशक्ति पनि थिएन, नयाँ बिल्डिङ ह्यान्डओभर भयो, त्यसपछि सेवा विस्तार गरेका छौं,’ सुचना अधिकारी ढकाल भन्छन् ।
नयाँ भवन बनेपछि अस्पतालले सेवा विस्तार गरेको छ । २ वटा अप्रेसन थिएटरबाट सेवा दिने गरिएको छ । ल्याब स्तरोन्नती गरिएको छ । विस्तारित स्वास्थ्य सेवा पनि सुरु भएको छ । अस्पतालमा आईसीयु सञ्चालन गर्नुपर्ने अबको पहिलो प्राथमिकता रहेको सूचना अधिकारी ढकालले बताए ।
