पोखरा-पोखरामा आधुनिक उपचार पद्धति अपनाउँदै बिरामीको उपचार थालनी गर्ने पुराना डा. कुमार शमशेर राणाको पोखरामा निधन भएको छ । ६० वर्षभन्दा बढी बिरामी जाँच गरेका राणाको शुक्रबार ८५ वर्षको उमेरमा निधन भएको हो ।
राणालाई लामो समयदेखि सुगर, दम र उच्च रक्तचापको समस्या थियो । उनलाई जाँच गरिरहेका प्रा.डा. बुद्धिबहादुर थापाका अनुसार पछिल्लो समय निमोनिया भएको थियो । स्वास्थ्य अवस्था कमजोर बनेपछि राणालाई अस्पताल लगिएको थियो ।
राणाको स्वास्थ्य हेरचाह पछिल्ला वर्षहरुमा प्रा.डा. थापाले गर्ने गर्थे । ‘डाक्टर कुमार शमशेरबाट धेरै सिक्ने अवसर पाएँ,’ उनले भने, ‘उहाँ उपचार गर्न पाउनु गौरवको कुरा हो ।’ डा. थापा दोस्रो पुस्ताका अब्बल डाक्टर मानिन्छन् ।
राणा पोखराको पद्म नर्सिङ होमका संस्थापक थिए । सरकारी अस्पतालको भन्दा फरक सेवा दिने गरी नर्सिङ होम खोलेको उनी बताउने गर्थे । वि.सं. १९९४ सालमा पाल्पामा जन्मिएका राणाले भारतको लखनउबाट चिकित्सा शिक्षा लिएका थिए । उनले वि.सं. २०१९ सालमा भक्तपुरबाट सेवा सुरु गरेका थिए । वि.सं. २०२६ सालदेखि पोखरा आएका राणा पोखरामै बस्थे । उनले नै पोखरामा एलोपेथिक औषधीको माध्यमबाट गरिने उपचार पद्धति भित्र्याएको बताइन्छ ।
राणाले स्वास्थ्य सेवा दिने बेला एकपटक भेटेका बिरामीले उनैबाट स्वास्थ्य जाँच गराउन चाहन्थे । उनले पश्चिमाञ्चल क्षेत्रीय अस्पतालमा लामो समय काम काम गरे । निधनको २ हप्ता अघिसम्म पनि राणाले पद्म नर्सिङको ओपिडी वार्ड बिरामी हेर्ने गरेका थिए । उनी स्वास्थ्यकर्मीले पैसामात्रै होइन्, सेवाको भावले हेर्नुपर्ने बताउँथे ।
पोखराका दोस्रो पुस्ताका कन्सल्टेन्ट फिजिसियन डा. वसन्त ताम्राकार राणालाई सरल, शालीन स्वभावका व्यक्ति भएको बताउँछन् । उनी भन्छन्, ‘अहिले त नयाँ नयाँ प्रविधिको कुरा पनि छ, तर सामान्य तरिकाले पनि धेरै बिरामीलाई निको पार्न सकिन्छ भन्ने उहाँले देखाउनुभयो । डाक्टर एसोसिएसनका अध्यक्ष पनि हुनुभयो । १९८६ मा नेपाल मेडिकल एसोसिएसनको भेला समेत गराउनुभएको थियो । डा. राणा आउने बेला त पोखरामा डाक्टर नै थिएनन् ।’
राणाका छोरा र श्रीमतीको यसअघि नै मृत्यु भइसकेको छ । उनका बुहारी, छोरी र नाति-नातिना छन् ।
