पोखरा— स्वास्थ्य बिमा दर्ता सहयोगीले जिल्ला स्वास्थ्य बिमामा सम्पर्क कार्यालय नवलपुरमा तालाबन्दी गरेका छन् । बिमाको जिल्ला सम्पर्क कार्यालय पुगेका दर्ता सहयोगीले विभिन्न मागसहितको ज्ञापनपत्र बुझाएपश्चात् तालबन्दी गरेका हुन् ।
बिमा दर्ता समूहको टोलीले पूर्व जानकारी बिना नै कार्यालयमा आएको र ज्ञापनपत्र बुझाएलगत्तै कुनै कुरै नगरी तालाबन्दी गरेको बिमा बोर्ड नवलपुर जिल्ला प्रमुख जागेश्वर भुसाल बताउँछन् । ‘अकस्मात् आएर विषयवस्तुमा प्रवेश अलिकति गर्नुभयो । ध्यानार्षणपत्र, विज्ञप्ति दिनुभयो, ढ्यामढुम ताला लगाउनुभयो । हामीलाई अप्ठ्यारो पार्नुभयो,’ उनले भने ।
उनले ताला लगाएर गएपछि माथिका सबै निकायलाई जानकारी दिइएको बताए । मंगलबार तालाबन्दी गर्ने पक्षलाई वार्तामा बोलाउने, सम्भव भए बोर्ड काठमाडौंका प्रतिनिधिसमेत सहभागी गराउने योजना रहेको उनले बताए । ‘नभए यहाँको सहमति माथि केन्द्रमा कार्यान्वयन गराउन जोडदार माग गर्ने भन्ने छ,’ उनले थपे ।
प्रमुख भुसालका अनुसार आन्दोलित बिमा दर्ता सहयोगीका माग जिल्लामार्फत् सम्बोधन गर्न नसकिने खालका छन् । स्टेशनरी, फाराम जिल्लाले दिने अख्तियारी छैन, सेवा प्रदायकले समयमा भुक्तानी नपाउने, भुक्तानी नपाएपछि सेवा राम्रो नहुने, सेवा राम्रो नभएपछि बिमित दर्ता सहयोगीलाई कराउने र दर्ता सहयोगी बिमाको कार्यालय पुग्ने अवस्था रहेको छ ।
नवलपुर स्वास्थ्य बिमा कार्यालय प्रमुख भुसाल केन्द्रबाट सम्बोधन नहुँदा समस्या आएको बताउँछन् । ‘हामीले मंगलबारका लागि वार्तामा बोलाएका छौं । वार्तामा आउनुभएन भने सिडियो र प्रहरीको निर्देशन र सहयोगमा ताला तोडेर काम गर्ने वा के गर्ने भन्ने निष्कर्ष निकाल्छौंं । नत्र केन्द्रकै मुख ताक्नुको विकल्प छैन,’ उनले भने ।
बिमा दर्ता सहयोगीले करिब १ वर्ष अघिदेखिको पारिश्रमिक नपाएको, बिमितलाई स्वास्थ्य सेवा प्रदायक संस्थाले सम्मानजनक व्यवहार नगरेकोे, बिमाले समेटेको औषधी र गुणस्तरीय उपचारमा ध्यान नदिएको, केन्द्रीय बिमा बोर्डले समयमै सेवा प्रदायक संस्थालाई भुक्तानी नदिएको, स्वास्थ्य सेवा प्रादायक संस्थामा बिमा सहायता कक्ष स्थापना नगरिएको आरोप लगाएका छन् । यी सबैको समाधान केन्द्रीय बिमा बोर्डमात्र भएको नवलपुर प्रमुख भुसाल बताउँछन् । नवलपुर जिल्लामा २०७७ फागुनबाट स्वास्थ्य बिमा कार्यक्रम सुरु भएको थियो । जसका लागि ९२ जना दर्ता सहयोगी रहेका छन् ।
स्वास्थ्य बिमा बोर्ड प्रदेश कार्यालय पोखराका संयोजक जीवलाल खरेल आफू काठमाडौंमा तालाबन्दीबारे बुझेर मात्रै भन्न सकिने बताउँछन् । यसअघिको कुराकानीमा संयोजक खरेल डाक्टरका कारण पनि केही औषधी नपाउने र स्वास्थ्य बिमा बोर्डले निरन्तर रुपमा बिमा दाबी भुक्तानी गरिरहेको दाबी गरेका थिए । तथापि देशभरबाट बिमा रकम भुक्तानी नहुँदा सेवामा सास्ती भएका समाचार आइरहेका छन् ।
बिमा रकम नपाएपछि सेवा बन्द गर्छाैं भन्ने सेवा प्रदायकलाई सेवा नियमित गर्न स्वास्थ्य बिमा बोर्डले आग्रहसमेत गरेको थियो । पोखरा स्वास्थ्य विज्ञान प्रतिष्ठान पश्चिमाञ्चल क्षेत्रीय अस्पतालका निर्देशक प्रा.डा. भरतबहादुर खत्री स्वास्थ्य बिमा बोर्डले समयमै भुक्तानी दिनै नसकेको बताउँछन् । ‘करोडौंं भुक्तानी गर्नुपर्ने बेला लाख भुक्तानी दिने गरेको छ,’ उनी भन्छन् ।
मध्यबिन्दु जिल्ला अस्पतालका मेडिकल सुपरिटेन्डेन्ट डा. वीरबहादुर थापा बिमा दाबी रकम १ करोड ७५ लाख हुँदा ५५ लाखमात्रै भुक्तानी पाएको बताउँछन् ।
