ललितपुर—जवालाखेलस्थित क्लिनिक वानले एक दिने पुरुष प्रजनन स्वास्थ्य सम्बन्धि निःशुल्क स्वास्थ्य शिविर सञ्चालन गरेको छ । पुरुष प्रजनन स्वास्थ्य समस्या समाजमा व्याप्त हुँदा पनि यसका लागि परामर्श लिन जाने पुरुषहरुको संख्या निकै कम छ ।
‘पुरुष स्वास्थ्य महिना’को जुन महिनालाई मनाइन्छ । यही अवसर पारेर क्लिनिक वानले ११ असारमा जावलाखेलमा पुरुष प्रजनन स्वास्थ्य सम्बन्धि निःशुल्क स्वास्थ्य शिविरको आयोजना गरेको हो ।
स्वास्थ्य शिविरमा नेपालकै पहिलो पुरुष प्रजनन स्वास्थ्य (एन्ड्रोलोजीमा पि.एच.डी) गरेका डा. गौरव पोख्रेलले स्वास्थ्य परीक्षण तथा परामर्श सेवा दिएका थिए ।
‘हाम्रो समाजमा अझै पनि पुरुष प्रजनन स्वास्थ्यको बारेमा खुला रुपमा कुरा गरिदैन् । पुरुष प्रजनन स्वास्थ्यको बारेमा खुलेर कुरा गर्न प्रोत्साहन गर्नका लागि निःशुल्क स्वास्थ्य शिविर आयोजना गरेका हौं,’ क्लिनिक वानका सीईओ रघु राना भने ।
त्यस्तै डा. पोखरेलले नेपालमा बाँझोपन सम्बन्धी समस्या भएका धेरै व्यक्तिहरुलाई कुन डाक्टरसँग परामर्श लिने भन्नेबारे जानकारी नभएको बताए । शिविरमा आएका नवयुवाहरुलाई शीघ्र स्खलन तथा धेरै हस्तमैथुन गर्दा नंपुसकता हुन्छ कि? भन्ने जस्ता जिज्ञासा राखेको उनले बताए । ‘नेपालमा अझैपनि पुरुष प्रजनन स्वास्थ्य सम्बन्धी ज्ञानको कमी छ, त्यसैले भविष्यमा अझैपनि पुरुष प्रजनन स्वास्थ्य सम्बन्धी कार्यक्रम आवश्यक छ,’ डा. पोखरेलले भने ।
भक्तपुर भेलुखेल बृहत निःशुल्क स्वास्थ्य शिविर
११ असारमा नै क्लिनिक वानले भेलुखेल–५ भक्तपुरको देउला आधारभूत विद्यालय बृहत निःशुल्क स्वास्थ्य सेवा शिविर गरेको छ । क्लिनिक वान भक्तपुर तथा उज्यालो बचत तथा ऋण सहकारी संस्थाको संयुक्त आयोजनामा भएको यस कार्यक्रममा सहयोगी संस्था श्रीकुमारी क्लब रहेको थियो ।
शिविरमा दन्त विशेषज्ञ, स्त्री रोग विशेषज्ञ, पेट, आन्द्रा तथा कलेजो रोग विशेषज्ञ तथा जनरल फिजिसियनद्वारा परामर्श प्रदान गरिएको थियो । शिविरबाट भेलुखेलका ६५ जना बासिन्दाहरु लाभान्वित भएको क्लिनिक वानका प्रबन्ध निर्देशक सन्तोष पौडेलले जानकारी दिए ।
विशेषज्ञ डाक्टरहरुबाट निःशुल्क परामर्श पाएकोमा पाएकोमा स्थानीयहरुले खुसी व्यक्त गरेका थिए ।
शिविरमा सेवा प्रदान गरेकी जनरल फिजिसियन डा. सुजिता वैद्यका अनुसार शिविरमा आएका अधिकांशमा हाडजोर्नीको समस्या रहेको थियो । साथै, स्वास्थ्य शिविरमा आएका धेरै बालबालिकाहरुमा ज्वरो तथा खोकीको समस्या देखिएको उनले जानकारी दिइन् । वर्षायामको मौसम भएकाले हैजा फैलिन सक्ने भन्दै उनले सर्तक रहनका लागि आग्रह गरिन् ।
शिविरमा सन्तुलित आहार तथा पौष्टिक खानाबारे प्रदर्शनी गरिएको थियो । क्लिनिक वानका डायटिसियन प्रतिक पौडेलले जन्मेदेखि ६ महिना र ६ महिनादेखि २ वर्षसम्मका बालबालिका तथा गर्भवती तथा सुत्केरी महिलाले कस्तो खाना खानुपर्छ भन्नेबारेमा जानकारी दिएका थिए ।
