चरिकोट—दोलखाको वैतेश्वर गाउँपालिका–८ का वडाअध्यक्षले ज्येष्ठ नागरिकहरुलाई हर्लिक्स दिएर पदभार ग्रहण गरेका छन् । आफ्ना वडाका नागरिकहरु स्वस्थ र फूर्तिलो रहोस भन्दै वडाअध्यक्ष शान्त जिरेलले हर्लिक्स वितरण गरेका छन् ।
७० वर्ष उमेर पुगेका १६० जना ज्येष्ठ नागरिकहरुलाई आज एक समारोहकाबीच हर्लिस वितरण गरेका हुन् । यस वडामा सामाजिक सुरक्षा भत्ता लिने १६० जना ज्येष्ठ नागरिकहरु रहेका छन् । त्यसैको आधारमा हर्लिक्स वितरण गरेका हुन् । गाउँमा गाईभैसी पाल्न छाडेका हुनाले दूध, घ्यू नपाइने तर शरीरलाई पौष्टिक तत्व चाहिने भएकाले हर्लिक्स वितरण गरिएको नवनिर्वाचित वडाअध्यक्ष जिरेलले बताए ।
गाउँका स्वास्थ्य संस्थामा भनेजस्तो स्वास्थ्य सेवा पनि नपाइने र विशेषज्ञ चिकित्सकहरु नभएकाले छिट्टै नै वडाले यी समस्या समाधानको लागि पहल गरिदिनुहुन स्थानीयले अनुरोध गरेका थिए । सामान्य स्वास्थ्य जाँचको लागि पनि सदरमुकाम चरिकोट धाउनुपर्ने बाध्यता छ ।
गाउँमानै वडाले स्वास्थ्य सुविधा व्यवस्था गर्न सकेमा अरु विकासको काम नभएपनि हुने स्थानीय ज्येष्ठ नागरिकहरुका अपेक्षा थिए । वडाअध्यक्षले पदभार ग्रहण गर्दानै स्वास्थ्य क्षेत्रलाई उच्च प्राथमिकता दिएका हुनाले आगामी दिनमा अझ स्वास्थ्य क्षेत्रलाई पहिलो प्राथमिकता दिन ज्येष्ठ नागरिकहरुले आग्रह गरेका छन् ।
