पोखरा–गण्डकी प्रदेशको सबैभन्दा ठूलो सरकारी अस्पताल पोखरा स्वास्थ्य विज्ञान प्रतिष्ठान, पश्चिमाञ्चल क्षेत्रीय अस्पतालका सेवा हरेक शनिबार र आइतबार बन्द हुने भएको छ । नेपाल सरकारले १ जेठदेखि लागु हुने गरी आइतबार नियमित बिदा दिने निर्णय कार्यान्वयन गर्न बिदा दिइएको हो ।
१ जेठमा आइतबार अस्पताल खोलिएको भएपनि डाक्टर तथा कर्मचारीले सेवा दिन नमानेपछि बिदा दिने निर्णय गरिएको अस्पतालका निर्देशक प्रा.डा. भरतबहादुर खत्रीले बताए ।
‘प्रशासनले सेवा दिने र अस्पताल खोल्ने भनेको थियो,’ उनले भने, ‘गएको आइतबार स्वास्थ्यकर्मी सरकारले दिएको सुविधा किन नदिने भन्दै काम नगरेपछि बन्द गर्न बाध्य भयौं । आम नागरिकलाई पर्नसक्ने असुविधाप्रति सरकारले पहिले नै सोच्नुपथ्र्यो ।’
निर्देशक डा. खत्रीकाअनुसार अर्काे आइतबारबाट विस्तारित स्वास्थ्य सेवा (ईएचएस) सञ्चालन गर्न गरिनेछ । ‘यो अलि महँगो पर्न जान्छ । यस्तै लगातार २ दिन बिदा हुँदा बिरामीलाई मर्का पर्नेतर्फ सरकारले वर्कवाउट किन नगरेको हो ?,’ उनले प्रश्न गरे ।
अस्पताल प्रशासन भने साउनबाट बिदा कार्यान्वयन गर्ने र एक्टेन्डेड हेल्थ सर्भिस दिएर बिदा कार्यान्वयन गर्ने तयारीमा थियो । स्वास्थ्यकर्मी तथा कर्मचारीले ५२ दिनको पेमेन्ट पाए काम गर्न तयार रहेको बताएका छन् ।
