दोलखा–दोलखाको शैलुङ गाउँपालिका–६ मा स्वास्थ्यकर्मी दिपक बस्नेत वडाअध्यक्ष निर्वाचित भएका छन् । नेकपा माओवादी केन्द्रबाट उम्मेदवार बनेका बस्नेतले प्रतिद्वन्द्वी नारायणबहादुर खड्कालाई १ सय ४२ मतले पराजित गरेका हुन् ।
दोलखा बहुउद्देश्यीय तालिम संस्थानबाट वि.सं. २०५७ सालमा सिएमए अध्ययन गरी शैलुङ गाउँपालिका ६ फस्कुमा मेडिकल सञ्चालन गर्दै आएका छन् । गाउँमा मेडिकल सञ्चालन गर्दा जनतासँग भेटघाट र दुःखसुख बुझ्ने भएकाले बस्नेतले सहज तरिकाले चुनाव जितेका थिए ।
सुरु–सुरुमा स्वास्थ्य संस्थामा सिटामोल समेत नपाउने अवस्था थियो । त्यस्तो अवस्थामा पैसानै तिरेर भएपनि बिरामीले गाउँमानै सेवा पाउने भएकाले मेडिकल सञ्चालन गर्नुपर्ने अवस्था थियो । कतिपय बिरामीहरु नियमित औषधि खानुपर्छ । भनेको समयमा औषधि उपलब्ध हुँदैन थियो, त्यस्ता जटिल अवस्थामा औषधि उपलब्ध गराइदिन्थे । गाउँमानै सहज तरिकाले भेटिने र स्वास्थ्यापचारमा आफूले धेरै सहयोग गर्ने उनको चुनावी नारा थियो ।
यस पालिकाको अन्य वडामा चुनाव जित्न धौ–धौ परेको बेलामा आफूले सहज तरिकाले चुनाव जितेको बस्नेत बताउँछन् । सिएमए उतीर्ण भएपछि उनी गाउँमानै मेडिकल राखेर बसेका थिए । पैसा नभएका विपन्न वर्गलाई उनले निःशुल्कै उपचार गर्ने गर्थे । पैसा नभएका तर उपचार नगरि नहुनेलाई उनले सित्तैमा औषधि समेत उपलब्ध गराउँदैं आएका छन् । आफूले समस्याको बेलामा सेवा गरेका हुनाले अहिले चुनाव जित्न सहज भएको बस्नेतको भनाइँ छ ।
