बुटवल—प्रदेशको गौरवको आयोजनाका रुपमा रहेको लुम्बिनी प्रादेशिक अस्पतालको नयाँ भवनको विवादित टेण्डर रद्द भएको छ । १२ सय शैयाको १० तले भवन निर्माणको लागि गत फागुन ८ गते र चैत २ गते गरी दुई पटक आह्वान गरिएको टेण्डर सार्वजनिक खरिद ऐन बमोजिम सोमबारको निर्णयअनुसार रद्द गरिएको प्रदेश पूर्वाधार विकास प्राधिकरणका प्रमुख कार्यकारी अधिकृत अनन्तराज घिमिरेले जानकारी दिए ।
विवादित टेण्डरबारे उच्च अदालत दाङमा मुद्दा परेको थियो भने अख्तियार दुरुपयोग अनुसन्धान आयोगमा पनि उजुरीहरु परेको थियो । नीतिगत रुपमै टेण्डरमा अन्य पक्षको सहभागिता हुनै नसक्ने गरी स्पेशिफिकेशन निर्माण भएको भन्दै सूचना बाहिरिएको थियो । स्पेशिफिकेसनको मापदण्डले जेआईईसी रसुवा र शर्मा जेभीबाहेक अरु सहभागी हुन नपाउने अवस्था सिर्जना हुने गरी टेण्डर आह्वान भएको थियो ।
सोही बमोजिम टेन्डरमा पनि रमेश शर्माको जेडआईईसी–शर्मा र रसुवाका मोहन आचार्यको रसुवा जेभी मात्र टेण्डरमा सहभागी भएका थिए । धेरै कम्पनीबीच प्रतिस्पर्धा हुन नसक्दा ५ अर्बभन्दा बढीको ठेक्कामा राज्यलाई डेढ अर्ब रुपैयाँ नोक्सान हुने देखिएकाले टेण्डर रद्द गराएको प्रदेश पूर्वाधार विकास प्राधिकरणका प्रमुख कार्यकारी अधिकृत घिमिरेले बताए ।
निजी क्षेत्रका डबल बेसमेन्ट अस्पताल बनाएका निर्माण कम्पनीहरुलाई समेत ठेक्का प्रक्रियामा भाग लिन नपाउने गरी बोलपत्र आह्वान भएको ठहर सार्वजनिक खरिद अनुगन कार्यालयले गरेको थियो ।
स्फेशिफिकेशनमा १० जना अट्ने लिफ्ट, २ तले अण्डरग्राउण्ड निर्माणको अनुभव, ठेकदारले काम गरेको सरकारी अस्पतालको कार्य अनुभवलगायतका विषय राखिएको थियो । प्रदेश सरकारले बनाएको गुरुयोजना अनुसार १२ सय शैयाको १० तलाको अस्पताल भवनको माथि हेलिप्याड र हेलिप्याडबाट सिधै इमर्जेन्सीमा झर्ने लिफ्टसमेत बनाउने तयारी छ ।
टेण्डर प्रक्रिया नै विवादमा परेपछि लुम्बिनी प्रदेश विकास प्राधिकरणका प्रमुख कार्यकारी अधिकृत (सिईओ) राजीनामा दिएका छन् । उनले भवन निर्माण ठेक्काको मिलेमतो स्वीकार्दै राजीनामा दिएका हुन् ।
