विराटनगर–पूर्वाधारमा फड्को मार्दै अगाडि बढेको विराटनगरस्थित कोशी अस्पताल भित्र सुविधासम्पन्न स्त्री तथा प्रसूति विभागको छुट्टै भवन संचालनमा आएको छ । अमेरिकी सेनाको सहयोगमा निर्माण भएर एक साता अगाडि हस्तान्तरण भएको प्रसुति विभागको भवन आइतबार स्वास्थ्य तथा जनसंख्या मन्त्री विरोध खतिवडाले उद्घाटन गरेका हुन् ।
१२ करोड रुपैयाँ लागतमा नवनिर्मत प्रसूति भवनमा ७१ शैय्या रहेको छ । नयाँ बनेको भवनमा विरामी राखेर प्रसूतीको सेवा आरम्भ भएको छ । नयाँ भवनबाट सामान्य प्रसूति, जटिल प्रसूति तथा शल्यक्रिया, सुरक्षित गर्भपतन र स्त्री रोग सम्बन्धीको सम्पूर्ण सेवाहरु संचालनमा आउने स्त्री रोग तथा प्रसुति विभागका प डा. अन्जु देवले जानकारी दिइन् । यसअघि जीर्ण भवनबाट अस्पतालले प्रसूतिको सेवा दिदै आएको थियो । नयाँ सुविधा सम्पन्न भवन बनेपछि उपचारमा सहजता हुने डा. देवले बताइन् ।
‘यसअघि जीर्ण भवनमा कष्टकर तरिकाले सेवा दिनुपर्ने बाध्यता थियो । नयाँ भवन बनेपछि बिरामीलाई उपचारमा सहज हुनेछ,’ उनले भनिन्, ‘अस्पतालमा अहिले दैनिक जसो २० देखि ३० जनासम्मको प्रसूति हुने गरेको छ । यहाँ प्रदेश १ र २ देखि भारतको बिहार प्रदेशसम्मका बिरामी सेवा लिन आउने गरेका छन् ।’ सुविधा सम्पन्न भवनमा स्त्री रोग तथा प्रसूती सेवा सुरु भएपछि बिरामीको उपचार गर्न धेरै सहज हुने उनको भनाइ छ । उनका अनुसार कोशी अस्पतालमा वर्षमा ९ देखि १० हजार जनाको प्रसूति हुने गरेको छ ।
उद्घाटन कार्यक्रममा स्वास्थ्य तथा जनसंख्या मन्त्री बिरोध खतिवडाले कोशीलाई सुविधा सम्पन्न अस्पताल बनाएर देशको नमूना अस्पतालको रुपमा बिकास गरेर अगाडी बढने बताए । भौतिक पूर्वाधारले सम्पन्न बनाउँदै प्रयाप्त जनशक्तिको व्यवस्थापन गरेर गुणस्तरीय सेवा प्रदान गरेर देशको नमूना अस्पताल बनाउने सरकारको योजना रहेको उनले बताए । त्यही अनुसार अहिले संरचनाहरु बन्दै गएको उनले बताए । मन्त्री खतिवडाले फागुन १ गतेदेखि देशभरी सर्वसाधरणलाई लगान सुरु गरिएको कोभिड १९ विरुद्धको ‘बुस्टर डोज’ खोप अभियानलाई प्रभावकारी रूपमा अगाडी बढाउनुपर्ने बताए ।
प्रदेश १ का स्वास्थ्य मन्त्री जयराम यादवले कोशीलाई प्रदेश १ को गौरवको अस्पतालको रुपमा विकास गरेर अगाडि बढनुपर्ने बताए । स्वास्थ्य सेवालाई प्रभावकारी बनाउँदै यस प्रदेशको गौरवको अस्पतालको रुपमा विकास गर्न सबै लाग्नुपर्नेमा जोड दिए ।
स्वास्थ्य तथा जनसंख्या मन्त्रालयका सचिव डा. रोशन पोखरेलले सरकारी अस्पताललमा विपन्न समुदायका बढी बिरामी आउने भएकोले गुणस्तरीय सेवा प्रदान गरी बिरामीको मन जित्नुपर्ने बताए ।
स्वास्थ्य तथा जनसंख्या मन्त्रालयका प्रवक्ता डा. संगीता मिश्राले देशभरिमा कोशी अस्पताल तेस्रोमा आउने भएकोले यस अस्पतालले गुणस्तरीय सेवा दिएर अगाडि बढनुपर्नेमा जोड दिइन् । प्रत्येक वर्ष ९ देखि १० हजारको प्रसूति गराउने अस्पताल कोशी पर्ने भएकोले थप सेवा विस्तार गर्दै बिरामीलाई सहज रुपमा सेवा प्रदान दिनुपर्ने बताइन् ।
स्त्री रोग तथा प्रसू्ति रोग विभागमा ८ जना विशेषज्ञ चिकित्सक रहेका छन् । सेवा प्रवाहसँग थप स्वास्थ्य जनशक्ति परिचालन गर्ने अस्पतालका मेडिकल सुपरिटेन्डटेन्ट (मेसु) डा. चुमनलाल दासले जानकारी दिए । दुईतलाको संरचना रहेको प्रसूति विभागको निर्माण कार्य २०७७ असार अन्तिम सातादेखि सुरु भएको थियो । इतिहास बोकेको अस्पतालले अहिले १७ वटा सेवा प्रदान गर्दै आएको उनले बताए ।
६ वटा पब्लिक हेल्थको सेवाहरु पनि सुचारु रहेको उनले जानकारी गराए । सुपर स्पेस्यालिटी हस्पिटल बनाउन लागि परेको मेसु दासले बताए । ‘अहिले पूर्वाधारहरु धमाधम थप भइरहेका छन्,’ उनले भने, ‘यो बन्दै गरेको भौतिक संरचनाहरु सुपर स्पेस्यालिटी हस्पिटलको लागि हो ।’
