पोखरा—फिजियो थेरापी संघ गण्डकी प्रदेशको तेस्रो अधिवेशनबाट शिवप्रसाद तिवारी अध्यक्ष चयन भएका छन् । शनिबार पोखरामा भएको अधिवेशनले उपाध्यक्ष विवेक लम्साल, सचिव सुरेश पहारी, कोषाध्यक्ष प्रवीण त्रिपाठी चयन गरेको छ ।
सदस्यहरु किशोर पराजुली, हरिशचन्द्र जोशी, सरोज थापा, चन्द्रबहादुर खत्री, सुरक्षा पराजुली, सुनील न्यौपाने र मनीषकुमार शाह छन् ।
अधिवेशन उद्घाटन सत्रका वक्ताहरुले फिजियोथेरापी सेवा विस्तार गर्न र यसको महत्व आम नागरिकलाई बुझाउन संघले भूमिका खेल्नुपर्ने बताए ।
अध्यक्ष शिवप्रसाद तिवारीले महिनाको एकपटक फिजियोथेरापीसम्बन्धी कार्यक्रम गर्ने, जनचेतामूलक कार्यक्रम सञ्चालन गर्ने, फिजियोथेरापी सेवामा संलग्न चिकित्सकहरुको सीप विकास गराउँदै संस्था र व्यक्तिलाई सबल बनाउने योजना प्रस्तुत गरे ।
देशभर ३ हजार हाराहारीमा फिजियोथेरापिस्ट रहेको अध्यक्ष तिवारीले बताए । उनका अनुसार गण्डकीमा ५६ जना थेरापिस्ट रहेको उनले बताए । त्यसबाहेक पोखरा विश्वविद्यालयमा ४० जना फिजियो थेरापिस्ट विद्यार्थी रहेको उनले स्पष्ट पारे । पोखरामा मात्रै ४४ जना फिजियोथेरापिस्ट रहेका छन् ।
फिजियोथेरापीको माध्यमबाट उपचार गर्दा माइक्रो वेभ, करेन्ट, कसरत लगायत फिजिकल एजेन्टको उपयोग गरिने तिवारीले जानकारी दिए । आयुर्वेदिक औषधीहरुको भने उपयोग हुँदैन् ।
फिजियोथेरापीको माध्यमबाट पक्षघातको समस्या भएमा, हातखुट्टा टेक्न समस्या भएमा, नचल्ने बांगिने भएमा, ढाड दुखेको, नसा च्यापिएका समस्यामा लाभ लिन सकिने तिवारी बताउँछन् ।
पछिल्लो समय राज्यस्तरबाट फिजियोथेरापीलाई प्रोत्साहन भएको उनको भनाइ थियो । उनले भने, ‘५० बेडभन्दा माथिका अस्पतालहरुले फिजियोथेरापिस्ट सेवा पनि दिने व्यवस्था मिलाइरहेका छन् । हामीले अस्पताहरुकै सहकार्यमा सेवा दिइरहेका छौं । छुट्टै क्लिनिकबाट पनि सेवा दिने गरेका छौं ।’
