पोखरा – गण्डकी प्रदेशका मनाङ, गोरखा, लमजुङ, तनहुँ, स्याङ्जा र कास्की जिल्लाका प्रमुख सरोकारवालाहरुसँग खोपको व्यवस्थापन र विपद व्यवस्थापनसम्बन्धि जुम बैठक बसेको छ ।
आइतबार बसेको सो बैठकमा कोभिडको लहर, विपद व्यवस्थापन, खोपका कार्यक्रमहरुबारे सरोकारवालाहरुसँग छलफल गरिएको हो ।
बैठकमा गण्डकी प्रदेशका मुख्यमन्त्री कृष्णचन्द्र नेपाली पोखरेलले आगामी दिनमा खोपको उपलब्धताको आधारमा खोप कार्यक्रम सञ्चालन भइरहेको र छिट्टै नै १८ वर्षभन्दा माथिका सबैलाई खोप उपलब्ध गराउने प्रदेश सरकारको पहिलो कार्यक्रम रहेका उनले प्रष्ट्याए ।
यस्तै, उनले प्रदेश सरकारको लक्ष्य अनुरूप खोप कार्यक्रम सञ्चालन गरेकोमा स्वास्थ्यकर्मी तथा र सरोकारवालाप्रति धन्यवाद व्यक्त गरेका छन्।
बैठकमा सहभागी भएका प्रदेश सरकारका मुख्य सचिव डा. दामोदर रेग्मी र स्वास्थ्य तथा जनसंख्या मन्त्रालयका मन्त्री मधुमाया अधिकारी गुरुङले खोप र विपद व्यवस्थापनसम्बन्धि धारणा राखेका थिए ।
स्वास्थ्य तथा जनसंख्या मन्त्रालयका सचिव विनोदविन्दु शर्माले खोप र विपद व्यवस्थापनका सन्दर्भको विश्लेषण गरेका थिए । कार्यक्रममा गण्डकी स्वास्थ्य निर्देशनालयका निर्देशक खिमबहादुर खड्का र प्रदेश आपूर्ति व्यवस्थापन केन्द्रका संयोजक नवराज शर्मा गण्डकी प्रदेशको खोप कार्यक्रमको अवस्थाबारे प्रस्तुतीकरण गरेका थिए ।
बैठकमा गण्डकी प्रदेशका समन्वय समितिका प्रमुखहरु, पालिकाका मेयर, उपमेयर, अध्यक्ष र उपाध्यक्ष, गण्डकी प्रदेशका प्रमुख जिल्ला अधिकारी, गण्डकी प्रदेश, स्वास्थ्य तथा जनसंख्या मन्त्रालयअन्तर्गतका प्रादेशिक स्वास्थ्य संस्थाका निर्देशक तथा प्रमुख सहभागी थिए ।
यस्तै, गण्डकी प्रदेशका स्वास्थ्य कार्यालयहरु, अस्पतालहरु र आयुर्वेद केन्द्र र अस्पतालका प्रमुखहरु, गण्डकी प्रदेशका सबै पालिकाका कार्यकारी अधिकृतहरु र स्वास्थ्य संयोजकहरू लगायतको उपस्थिति थियो । बाँकी जिल्लाहरूको बैठक मंगलबार सञ्चालन हुनेछ ।
