पोखरा—गण्डकी प्रदेशका मुख्यमन्त्री कृष्णचन्द्र नेपाली पोखरेल नेतृत्वको टोली भेरोसेल खोप लिएर गोरखाको उत्तरी गाउँपालिका चुमनुब्री पुगेको छ । शुक्रबार समाचार तयार पार्दासम्म मुख्यमन्त्रीसहितको टोली छेकम्पार पुगेको स्वास्थ्य तथा जनसंख्या मन्त्रालयका सचिव बिनोदबिन्दु शर्माले जानकारी दिए ।
उनका अनुसार मुख्यमन्त्री पोखरेलले विपद्ग्रस्त तामागाउँको अनुगमन गर्नेछन् । सचिव शर्माका अनुसार मौसम प्रतिकूल भएका कारण छेकम्पारमा रोकिएको टोली मौसम सुध्रिएपछि तामागाउँ जानेछ । उक्त गाउँपालिकाका लागि चाहिने ३ हजार खोपमध्ये केही खोप पोखराबाट टोलीले हेलिकप्टरमा लगेको छ भने केही खोप गोरखाबाट नै व्यवस्थापन गरिने सचिव शर्माले जानकारी दिए ।
चुमनुब्रीमा ३ हजार ५ सय डोज खोप चाहिनेमा ५ सय जनाले यसअघि नै खोप लगाइसकेका छन् । भण्डारण क्षमता कम भएका कारण प्रदेशबाट तत्काल जिल्लामा पठाउने र त्यसपछि पालिकाहरुमा पठाएर खोप लगाउने गरिएको छ ।
अहिले चुमनुब्री पठाइएको खोप ३ हजार जनालाई उपलब्ध गराइने छ । दोस्रो डोजका लागि फेरि प्रदेश सरकारले खोप पु¥याउनेछ । टोलीले खोपका साथमा मास्क, सेनिटाइजरलगायत स्वास्थ्य सामग्रीसमेत लगेको छ । टोलीमा स्वास्थ्य तथा जनसंख्यामन्त्री मधुमाया अधिकारी गुरुङ, ऊर्जा, सिँचाइ तथा जलस्रोत मन्त्री हरिशरण आचार्य, प्रमुख सचिव डा. दामोदर रेग्मी छन् ।
माउन्टेन चाइल्ड संस्थाको सहयोगमा हेलिकप्टरमार्फत् खोप चुमनुब्री पु¥याइएको हो । हेलिकोप्टरले पालिकाका ७ वटै वडाको केन्द्रमा खोप छाड्ने बताइएको छ ।
उता, चुमनुब्री गाउँपालिकाका अध्यक्ष धनबहादुर गुरुङले भने खोप ल्याउनेबारे आफूलाई कुनै जानकारी नभएको बताए । उनले भने, ‘हामीलाई कसैले जानकारी दिएकै छैन । काठमाडौंबाट हेलिकप्टर आउने भनेको भएपनि मौसम खराबका कारण त्यो पनि आएको छैन ।’
