पोखरा–साविक लेखनाथ नगरपालिकाको भवनमा पोखरा महानगरपालिकाले स्थापना गरेको कोभिड उपचार केन्द्रको प्रदेश मुख्यमन्त्री पृथ्वीसुब्बा गुरुङले उद्घाटन गरेका छन् । पोखरा महानगरपालिकाले करिब २ करोड लागतमा निर्माण गरेको उक्त केन्द्रमा ५० बेड तयारी अवस्थामा छन् भने थप ५० बेड तयार गर्ने योजना छ ।
महानगरले कोभिड–१९ संक्रमितको उपचार र कोभिड–१९ नियन्त्रणका लागि लायन्स क्लबको सहयोगमा केन्द्र स्थापना गरेको हो । शिशुवा अस्पताल मातहत रही केन्द्र सञ्चालन हुने पोखरा स्वास्थ्य महाशाखा प्रमुख हेमन्त शर्माले जानकारी दिए । उनका अनुसार कोभिड उपचार केन्द्रलाई पछि महानगर अस्पतालकै रुपमा विकास गरिनेछ । ‘अहिले नै बिरामी भर्ना गरिहाल्ने गरी तयारी नभएको र अहिले शिशुवा अस्पताल मातहत सञ्चालन गरिने भएकाले ह्यान्डओभरमात्रै गरिएको हो,’ उनले भने ।
लायन्सले बेडसहित सर्जिकल सामग्री, दराज, म्याट्रेस, अक्सिजन कन्सन्ट्रेटर, सोलार, पर्दालगायत सामग्री सहयोग गरेको छ । केन्द्रमा बेडसम्म अक्सिजन पु¥याउन पाइप जडान गरिएको छ ।
उक्त केन्द्रमा आगामी दिनमा आईसीयु, भेन्टिलेटरसमेत सञ्चालन गरिनेछ । शिशुवा अस्पतालका मेडिकल सुपरिटेन्डेन्ट प्रतिभा कोइरालाका अनुसार केन्द्रमा सामान्य र मध्यम खालका बिरामी राखेर उपचार गरिनेछ । अस्पतालमा २ मेडिकल अफिसर, ४ नर्सिङ स्टाफसहित प्यारामेडिक, कार्यालय सहयोगीलगायत हुनेछन् ।
