पोखरा–नवलपुरस्थित मध्यबिन्दु जिल्ला अस्पतालमा अक्सिजन प्लान्टबाट अक्सिजन उत्पादन सुरु भएको छ । प्लान्टबाट दैनिक १८ सिलिन्डर अक्सिजन उत्पादन हुने अस्पतालका सुपरिटेन्डेन्ट सर्जन डा.वीरबहादुर थापाले जानकारी दिए । एक सिलिन्डरमा करिब ६ हजार लिटर ग्यास अट्छ ।
अक्सिजन प्लान्ट रेगुलर प्रयोगमा खपत हुनेछ भने सिलिन्डरमा भर्न सकिने अवस्था छैन । ग्यास भर्न आवश्यक बुस्टर मेसिन अभावले पनि भर्न नसकिएको हो ।
उनकाअनुसार प्लान्टबाट उत्पादित अक्सिजनले मात्रै अस्पतालको माग पूरा हुन सक्ने अवस्था छैन । तथापि पहिले ल्याइरहेको अक्सिजन सिलिन्डर र प्लान्टबाट उत्पादिन अक्सिजन भएपछि सहज हुनेछ ।
अस्पतालमा भेन्टिलेटर भएर पनि प्रयोगमा ल्याउन नसकिएको उनको भनाइ थियो । उनले भने, ‘हामीसँग अथोरिटीअनुसार दक्ष जनशक्ति अभाव र अक्सिजनको कमीका कारण सञ्चालन गर्न नसकिएको हो ।’ बिरामीको संख्या बढ्न सक्छ, भेन्टिलेटर चलाउने हो भने त अक्सिजन धेरै नै कम हुन्छ ।’
हाइफ्लो अक्सिजन बेड ५ वटा तयारी अवस्थामा राखिएको छ । अस्पतालमा ४० बेड छन् । कोभिड–१९ पोजेटिभ रिपोर्ट आएका २३ र संक्रमितको शंका गरिएको तर पिसिआर पुष्टि नभएका अक्सिजन चाहिने १० जना बिरामी गरी ३३ बिरामी भर्ना भएको उनले बताए ।
‘पहिलेको ओपिडीलाई समेत कोभिड बिरामीको उपचारमा प्रयोग गर्ने गरी माथिबाट परिपत्र भएअनुसार बन्द छ । तर, बाहिरबाट २ जना मेडिकल अफिसरमार्फत सेवा दिइएको छ । संक्रमणदर उच्च भएका बेला अस्पताल आएका ४८÷५० जनासम्म एडजस्ट गरेका थियौं,’ उनले भने ।
डा. थापाका अनुसार नयाँ प्रिफ्याब १४÷१५ भवन पनि बन्दै छ । हामीले ग्यामिन (संस्था) को भवन प्रयोग गरेका छौं । कोरोना पुष्टि नभएका बिरामी त्यहीँ राखिएको छ ।
