विराटनगर—भारतको कोरोना संक्रमण तीव्र रूपमा फैलिएपछि मोरङको सीमा नकाहरूमा ‘एन्टिजेन परीक्षण’ सुरु भएको छ । सीमा नाकादेखि नेपाल प्रवेश गरेका नागरिकहरूको संक्रमण भए—नभएको पत्ता लगाउन ‘एन्टिजेन परीक्षण’ सुरु गरिएको हो । ‘एन्टिजेन परीक्षण’ रिपोर्ट १५ मिनेट भित्रमा दिने व्यवस्था मिलाएको छ ।
भारतबाट नेपाल प्रवेश गर्ने शंकास्पद नागरिकलाई लक्षित गर्दै विराटनगर महानगरले सीमावर्ती नाका रानीमा ‘एन्टिजेन परीक्षण’ सुरु गरेको छ । संक्रमणको जोखिमलाई न्यूनीकरण गर्न महानगरले मुल नाकामै एन्टिजेन परीक्षणको व्यवस्था गरेको हो ।
महानगरले भारतबाट नेपाल प्रवेश गर्ने नागरिकको व्यक्तिगत विवरण संकलन गरिसकेपछि उनीहरुको हेल्थ स्क्रिनिङ र ट्राभल हिस्ट्रीको आधारमा एन्टिजेन परीक्षण गर्दै आएको छ । महानगरले सीमा नाकामा दैनिक २५ देखि ३५ जनासम्मको एन्टिजेन परीक्षण गर्दै आएको छ ।
१५ मिनेटभित्रै प्राप्त हुने परीक्षणको नतिजा विश्लेषणको आधारमा सम्बन्धितलाई नेपाल प्रवेश दिइने गरिएको महानगरका मेडिकल अफिसर कमलकिशोर यादवले बताए । एन्टिजेन पोजिटिभ देखिएका व्यक्तिलाई तत्कालै सम्बन्धित स्थानीय तहको समन्वयमा १४ दिने होम क्वारेन्टाइनमा पठाउने व्यवस्था गरिएको उनले जानकारी दिए । ‘हामीले संक्रमित देखिएका नेपाली नागरिकलाई सम्बन्धित पालिकामै पठाउँछौ भने भारतीय नागरिकको हलमा त्यहाँको सरकारसँग समन्वय गरेर उतै पठाउने गरेका छौं,’ उनले भने ।
विराटनगर–१६ स्थित रानी नाकामा विश्व स्वास्थ्य संगठनले निर्माण गरिदिएको अस्थायी टहरामार्फत महानगरले जोगबनी नाका हुँदै नेपाल भित्रिएका १ सय ३० जनाको एन्टिजेन परीक्षण गरिसकेको छ । जसमा १० नेपाली र १ भारतीयसहित ११ जनामा कोरोनाको संक्रमण पुष्टि भएको छ । संक्रमण पुष्टि भएकामध्ये १० नेपालीलाई महानगरले सम्बन्धित स्थानीय तहमै पठाएको छ भने १ जना भारतीय नगरिकलाई भारतको क्वारेन्टिनमा राखिएको छ ।
संक्रमितको पहिचान गर्न रानीस्थित हेल्थ डेस्कमा महानगरले १ जना हेल्थ असिस्टेन्ट, १ जना मेडिकल अफिसर, ५ जना अनमी र १ जना ल्याब टेक्निसियनसहित १० जनाको दरबन्दी राखेको छ । पिसिआर परीक्षणको तुलनामा खर्च र नतिजा प्राप्त हुने समय पनि कम लाग्ने भएकाले एन्टिजेन परीक्षण प्रभावकारी देखिएको महानगरका मेडिकल अफिसर कमलकिशोर यादवले बताए ।
परीक्षणको क्रममा किट अभाव भए हेल्थ डेस्कले विराटनगर महानगरपालिका तथा प्रदेश सरकारसँग किट माग गर्ने गरेको छ । रानीस्थित हेल्थ डेस्कमा दैनिक बिहान ८ बजेदेखि बेलुकी ६ सम्म एन्टिजेन परीक्षण हुने गरेको छ ।
