बुटवल—लुम्बिनी प्रदेशमा कोरोना भाइरस संक्रमणको दर बालबालिकामा बढी देखिएको छ । बालबालिकामा खोकी लाग्ने, ज्वरो आउने, पखाला लाग्नेजस्ता लक्षण देखिने गरेका छन् ।
कोभिड—१९ को ‘नयाँ भेरियन्ट’ बढी संक्रामक र बालबालिका समेतलाई असर पुर्याउने खालको रहेको चिकित्सकहरु बताउँदै आएका छन् । नयाँ कोरोना भाइरस संक्रमण भएमा सन्चो हुने दर समेत कम रहेकोले सचेत हुनुपर्ने चिकित्सकहरु बताउँछन् ।
‘सिकिस्त अवस्थामा रहेका बिरामीहरुलाई सामान्य अवस्थामा फर्काउन गाह्रो हुनु, नयाँ रुपको कोरोनाको पुष्टी हुनुले त फेरि झस्काउन थालेको छ,’ लुम्बिनी प्रादेशिक अस्पतालका मेडिकल सुपरिटेन्डेन्ट डा. राजेन्द्र खनाल भन्छन्, ‘बेलैमा सतर्क बन्नुपर्छ, आफ्नो सुरक्षामा ध्यान दिनुपर्छ ।’
यसअघिको कोभिडको संक्रमण दर बालबालिकामा कम थियो । नयाँ भेरियन्टमा भने विद्यालय अध्ययन गर्ने बालबालिकामा देखा पर्नु चिन्ताको विषय भएको विज्ञहरु बताउँछन् ।
प्रदेशका मुख्य सहरहरु बुटवल, भैरहवा, घोराही, तुलसीपुर, कोहलपुर, नेपालगन्जलगायतमा बालबालिकामा संक्रमण बढिरहेको छ । रूपन्देहीमा एक हप्तामा २ सय ८ जना संक्रमित देखिएकामा १६ वर्षमुनिका ५ जना छन् । उता बाँकेमा ५५ जना बालबालिकामा संक्रमण देखिएको छ ।
रूपन्देहीको जिल्लास्तरीय कोभिड–१९ संकट व्यवस्थापन केन्द्रले आवश्यक स्वास्थ्य मापदण्ड पालना गरेर विद्यालय सञ्चालन गर्न दिने निर्णय गरेको भएपनि मापदण्ड पालनामा उदासीनता देखिएको छ ।
बालबालिकालाई विशेष निगरानी राख्ने बेला आएको चिकित्सक बताउँछन् । बालबालिकालाई भिडभाडमा जानबाट जोखाउने, विद्यालय पढाउँदा जनस्वास्थ्यका मापदण्ड आनिवार्य पालना गर्न लगाउने जस्ता संक्रमणबाट बच्ने उपाय अवलम्वन गर्नुपर्ने बालरोग विषेशज्ञ डा.सन्तोष पोखरेल बताउँछन् । ‘बालबालिकामा कुन प्यार्टनमा जान्छ, अहिले नै भन्न सकिने अवस्था छैन् । तर, पछिल्लो पटक देखा परेको संक्रमण बालबालिकामा समेत देखिएको छ । सचेत हुनुपर्ने अवस्था छ,’ उनले भने ।
बालबालिकाका निन्यारो हुने, नियमित क्रियाकलाप गर्न नसक्ने अवस्थामा आउने र श्वास फेर्न अप्ठ्यारो भएमा अस्पताल लैजानुपर्ने उनको सुझाव छ । अन्यथा बालबालिकालाई पोषणयुक्त खाना खुवाउने, भिडभाडबाट बचाउने काम गर्नुपर्ने डा. पोखरेलले बताए ।
सोमबार नै बसेको मन्त्रिपरिषद बैठकले सहरी क्षेत्रका विद्यालय बन्द गर्ने निर्णय गरिसकेको छ ।
