पोखरा—पोखरा एमआरआई एन्ड डाइग्नोस्टिक सेन्टरले गण्डकी प्रदेशमै ठूलो सिटी स्क्यान मेसिनबाट सेवा सञ्चालन गरेको छ । पोखरा एमआरआईले सबभन्दा ठूलो २ सय ५६ स्लाइसको सिटी स्क्यान मेसिनबाट सेवा सुरुवात गरेको हो । सेन्टरका प्रबन्ध निर्देशक डा. सुमीरमान श्रेष्ठका अनुसार यो मेसिन नेपालमै दोस्रो र प्रदेशमै पहिलो ठूलो मेसिन हो ।
प्रदेशका बिरामीलाई सहज, सुलभ गुणस्तरीय र सस्तो हिसाबले विभिन्न रोग पत्ता लगाउन विगत ३ वर्ष पहिले स्थापित सेन्टरले १ दशमलव ५ टेस्ला, एमआरआई, ममोग्राफी, युएसजी, गाइडेड बायोप्सी सुविधा दिँदै आएको डा. श्रेष्ठले उल्लेख गरे ।
‘स्वास्थ्य क्षेत्र र नयाँ प्रविधि सधैं नयाँ हुन्छ, स्वास्थ्य क्षेत्रमा काम गर्ने व्यक्ति सधैं विद्यार्थी हो । हामीले काठमाडौंको गंगालालमा गएर सिक्यौं, त्यससम्बन्धी अनुभवी सिनियर डाक्टरसहित ६ जनाको टिमले यो सेवा सञ्चालन गरेको हो,’ उनले भने,‘मैले पनि गंगालालमा गएर सिकेर आएको हुँ ।’
सिटी स्क्यानको रिपोर्ट दिन करिब १ दिन लाग्ने भएपनि बिहानको रिपोर्ट दिउँसोसम्म दिन सकिने बताइएको छ । डा. श्रेष्ठले भने, ‘मेसिनबाट टाउको, गर्धन, छाती पेट, हात खुट्टा र विशेष गरी मुटुको रगतको नसाको जाँचहरु एन्जियोग्राफीसमेत गर्न सकिन्छ ।’
डा श्रेष्ठले मेसिनबाट मुटु मस्तिक, फोक्सो पेट र हात खुट्टाको रगतको नसालगायत शरीरका विभिन्न अंगहरुको क्यान्सरलगायत सिटी स्क्यान गर्ने सुविधा दिने जानकारी दिए । यो मेसिनको प्रयोगबाट हृदयघात हुनसक्ने सम्भावना प्रतिशत पत्ता लगाउन सकिने डा. श्रेष्ठ दाबी गर्छन् ।
प्रदेशकै ठूलो मेसिनको सुविधा पोखरामै पाउने भएपछि मुटुको रगतको नसाको जाँच कोरियोनरी एन्जियोग्राफी गर्न काठमाडौं जान नपर्ने उनको भनाइ छ । डा.श्रेष्ठले पोखराका वरिष्ठ चिकित्सकले सञ्चालन गरेको सेन्टरमा वरिष्ठ रेडियोलोजिस्ट मनिषकुमार श्रेष्ठ, प्रकाश शर्मासहितको टिमले काम गर्ने बताए ।
पोखराका वरिष्ठ चिकित्सक कुमारसम्शेर राणाले सिटी स्क्यान सेवाको सुरुवात गरे । यसअघि सेवा सञ्चालन भएको भएपनि औपचारिक उद्घाटन भने शनिबार गरिएको निर्देशक डा.श्रेष्ठले बताए । औपचारिक शुभारम्भ हुनुअघि नै करिब साढे ४ सय जनाको सिटीस्क्यान गरिसकिएको छ ।
प्रदेशका बिरामीलाई सहज र सुलभ रुपमा गुणस्तरीय हिसाबले रोग पत्ता लगाउन डायग्नोस्टिक सेन्टरको सुरुवात गरेको सेन्टरका डाइरेक्टर श्रेष्ठ बताउँछन् ।
