जुम्ला—कर्णाली स्वास्थ्य विज्ञान प्रतिष्ठान जुम्लाको कार्यवहाक उपकुलपतिमा जिम्मा डा. मंगल रावलले पाएका छन् । सोमबार सहकुलपति समेत रहेका स्वास्थ्य तथा जनसंख्यामन्त्री हृदयेश त्रिपाठी डा. रावल कार्यवहाक उपकुलपतिको जिम्मेवारी दिएका हुन् ।
चार वर्षअघि नियुक्त भएका उपकुलपति प्रा.डा. राजेन्द्र वाग्लेको आइतबारदेखि कार्यकाल सम्पन्न भएपछि डा. रावलले कार्यवाहकको जिम्मेवारी पाएका हुन् ।
‘मलाई कार्यवाहक जिम्मेवारी दिइएको पत्र प्राप्त भएको छ,’ डा. रावलले हेल्थआवाजसँग भने ।
कर्णालीको हिमाली दुर्गम जिल्ला हुम्लामा जन्मेका डा. रावल विगत ६ वर्षदेखि कर्णाली स्वास्थ्य विज्ञान प्रतिष्ठान जुम्लामा कार्यरत थिए । डा. रावल पछिल्लो समय अस्पताल निर्देशकको रुपमा काम गर्दै आएका थिए । हाडजोर्नी विशेषज्ञ चिकित्सक तथा एशोसिएट प्रोफेसर डा. रावलले प्रतिष्ठानको वृद्धि विकासका लागि निकै महत्वपूर्ण भूमिका खेल्दै आएका छन् ।
कर्णालीमा कोरोना संकरण रोकथाम तथा नियन्त्रणमा महत्वपूर्ण भुमिका निर्वाह गरेका डा. रावल यस वर्षको प्रबल जनसेवा श्रीबाट विभूषित भएका हुन् । उनीसँगै प्रतिष्ठानका चिकित्सक धिरज गुरुङ पनि विभूषित भएका थिए ।
