काठमाडौं—लुम्बिनी प्रादेशिक अस्पतालले अस्पतालको इमर्जेन्सीमा कार्यरत चिकित्सकमाथि भएको हातपातको घटनाका दोषीलाई कारवाही गर्न माग गरेको छ । १० पुसको राति ११ बजे अस्पतालको इमर्जेन्सीमा कार्यरत चिकित्सक डा. शिव अर्यालमाथि एक बिरामीका आफन्तले हातपात तथा गाली गलौज गरेका थिए ।
बिरामी पार्वती सुनारको उपचारका क्रममा उनका छोरा अनुराग रसाइली, हिमाल रसाइली र बिरामीका श्रीमान भेषबहादुर सुनारको संलग्नतामा डा. अर्यालमाथि हातपात तथा गाली गलौज भएको थियो । उनीहरुले डा. अर्याललाई धम्काउने समेत काम गरेका थिए ।
अस्पतालले उक्त कार्य गैरजिम्मेवारीपूर्ण भएको भन्दैं घटनामाथि छानविन गरी दोषीलाई कारवाही गर्न इलाका १२ पुसमा इलाका प्रहरी कार्यलयमा उजुरी दिएको छ । अस्पतालका मेडिकल सुपरिटेन्डेन्ट डा. राजेन्द्र खनालले हस्ताक्षर गरेको उक्त उजुरी सामाजिक विकास मन्त्रालयलाई बोधार्थ दिइएको छ ।
उक्त घटनाप्रति नेपाल चिकित्सक संघ लुम्बिनी प्रदेश शाखाले पनि गम्भीर ध्यानाकर्षण भएको भन्दैं दोषीमाथि कारवाहीको माग गरेको छ । संघले आफ्ना आजीवन सदस्य डा. अर्यालमाथि आकस्मिक कक्षमा काम गर्दागर्दै अवस्थामा हातपात हुनुलाई निन्दनीय भनेको छ ।
‘अपराधीलाई कुनै पनि बहानामा माफी गर्नु हुँदैन र नियम कानुनअनुसार सजाय हुनुपर्छ भन्ने कुरामा चिकित्सक संघ स्पष्ट छ,’ महासचिव डा. सन्तोष पोख्रेलले हस्ताक्षर गरेको विज्ञप्तिमा छ । अर्याललाई न्याय दिलाउन कटिबद्ध रहेको पनि संघले स्पष्ट पारेको छ ।
यस्तै, राष्ट्रिय चिकित्सक संघ नेपालले पनि उक्त घटनाप्रति गम्भीर ध्यानाकर्षण भएको जनाएको छ । राष्ट्रिय चिकित्सक संघ लुम्बिनी शाखाका अध्यक्ष डा. समिर आचार्य र महासचिव डा. सागर न्यौपानेले संयुक्त रुपमा विज्ञप्ति जारी गर्दै कार्यक्षेत्रमा खटिरहेका चिकित्सकमाथि भएको उक्त निकृष्ट र निन्दनीय कार्यको विरोध गर्दै दोषीमाथि कारवाहीको माग गरिएको छ ।
