काठमाडौं–स्वास्थ्यको कारण देखाउँदैं राजीनामा दिएका चिकित्सक सांसदले आफ्नो राजीनामा फिर्ता लिएका छन् । गत साउन २७ गते सप्तरी–१ बाट प्रतिनिधीसभामा प्रत्यक्षतर्फ निर्वाचित सांसद डा. सुर्यनारायण यादवले स्वास्थ्यको कारण देखाउँदैं राजनीनामा संसद सचिवालयमा दर्ता गराएका थिए ।
पार्टीको आग्रहमा डा. यादवले आइतबार राजीनामा फिर्ता लिएका हुन् । उनी समाजवादी पार्टीका सांसद हुन् ।
उनको राजीनामालाई लिएर उनकै पार्टीभित्र र बाहिरबाट समेत फिर्ता लिन उनीमाथि तीब्र दबाब परेको थियो । डा. यादवले कतिपयले त डा. सिके राउतलाई उपनिर्वाचनमा लडाउने योजना अन्तर्गत राजीनामा दिएको आरोप समेत लगाएका थिए ।
सप्तरीको तिरहुत गाउँपालिकाका स्थायीवासी डा. यादवले प्रतिनिधीसभा निर्वाचनमा वाम गठबन्धनका उम्मेदवारलाई ३ हजार ४ सय ८७ मतले पराजित गर्दै तत्कालीन संघीय समाजवादी फोरमबाट चुनाव जितेका थिए । उनले २१ हजार ७ सय १२ मत ल्याएका थिए । उनका निकटतम प्रतिद्धन्द्धी वाम गठबन्धनका उम्मेदवार अशोक मण्डलले १८ हजार २ सय २५ मत ल्याएका थिए ।
डा. यादव पहिलो पटक गत प्रतिनिधीसभा निर्वाचनमा उम्मेदवार बनेका हुन् । गत निर्वाचनमा संघीय समाजवादी फोरमबाट निर्वाचनमा उम्मेदवार बनेर जित हासिल गरे । बालरोग विशेषज्ञ डा. लामो समय स्वास्थ्य पेशामा बिताएका सप्तरीका चर्चित चिकित्सक मानिन्छन् ।
