जनकपुर – सप्तरीमा एक नवजात शिशुको अस्पताल र डाक्टरका लापरवाहीले मृत्यु भएको भन्दै परिवारले कारवाहीका लागि माग गरेको छ । सप्तरीकाे राजविराज नगरपालिका वडा नं. ५ की २९ वर्षीया मौसमी सरकारको असोज ३० गते शुक्रबारका दिन गजेन्द्र नारायण सिंह अस्पतालमा सफल शल्यक्रिया गरी प्रसुति गराइएको थियो ।
उनले ३२ सय ग्रामको शिशुलाई जन्म दिएकी थिइन् । तर, अस्पतालमा एकपटक पनि बाल रोग विशेषज्ञ नआउँदा शिशुको मृत्यु भएको भन्दै परिवारले छानविनका लागि नेपाल मेडिकल काउन्सिलमा उजुरी समेत गरेको छ । डा. उषा देव र डा दिलिप साह र उनका सहयोगी स्टाफ नर्सहरुको टोलीले शिशुको जन्म भएपनि अस्पतालको अप्रेशन कक्षमा बाल रोग विशेषज्ञले चेकजाँच नगरेको परिवारको आरोप छ ।
मृत्यु भएका शिशुका बुबा पंकज कुमार सरकारले भने, ‘आमाको दुध नआउने, बच्चा रुने, शरीर काम्ने जस्तो समस्या देखिएपछि नर्सलाई जानकारी गराएको र उनले बच्चा भोकले रुदैछ भनेर जवाफ फर्काएको भन्दै नर्सकै सल्लाहमा बच्चालाई ल्याक्टोजिन दिन थालेको थियौं । तरपनि बच्चा जन्मिएपछि एकपटक पनि बाल रोग विशेषज्ञ हेर्न आएनन् ।’
सरकारले बच्चाको डाक्टरलाई बोलाइदिनुस् भनेर आग्रह गरेपनि अस्पतालले वेवास्ता गरेको भन्दै कात्तिक १ गते शनिबारका दिन राति साढे १० बजे बच्चा रुने, जिउँ तातो हुने र नर्सले पनि झर्केर बोल्दै फर्काएको बताए । सरकारले थपे, ‘कात्तिक २ गते आईतबार बिहान ३ बजे बच्चा झन् बढी रुन थालेपछि उसको अवस्थापनि कमजोर हुँदै गएको देखेर नर्सलाई भन्न जाँदा कोहीपनि नआएको र अस्पतालमा डाक्टर पनि उपस्थित नहुँदा म आत्तिए ।’
सरकारका अनुसार फोनमा एक जना डाक्टरसँग सम्पर्क हुँदा आफू अस्पतालमा नभएको बताए । अर्का डाक्टर ललन रौनियारसँग कुरा हुँदा उनले बच्चा बाहिर लिएर जानु पर्छ भनेर जवाफ दिएका थिए । डा. रौनियारसँग कुराकानी र अस्पतालमा नर्सलाई खोज्न जाँदा सम्म ढिलो भइसकेको भन्दै सरकारले धरान रेफर गरेपछि बाटोमै छोराको मृत्यु भइसकेको बताए ।
उनले धरान पुगेपछि डाक्टरले बच्चाको आधा घन्टा पहिले नै बाटोमै मृत्यु भइसकेको जानकारी गराएको बताए । अस्पतालको लापरवाहीकै कारण आफ्नो बच्चाको मृत्यु भएको भन्दै सरकारले घटनाबारे छानविका लागि अस्पताल प्रशासनलाई पनि आग्रह गरेका छन् । उनले अस्पतालको अव्यवस्थित वातावरण र डाक्टरको लापरबाहीका कारण आफ्नो छोराको मृत्यु भएको आरोप लगाएका छन् ।
यता, अस्पतालका मेडिकल सुप्रिटेन्डेन्ट डा. रञ्जीत झाले ७२ घन्टाको समय माग गर्दै दोषीलाई कारबाहीको दायरामा ल्याइएने आश्वासन दिएका छन् । घटनाबारे विस्तुत बुझेर सत्यतथ्य छानबिन गरिने पनि डा झाले बताएको मृतक शिशुका बुबा सरकारले बताए ।
