जनकपुर—धनुषास्थित महेन्द्रनारायण निधी स्मृती प्रतिष्ठानको अगुवाईमा प्रतिष्ठानकै जनकपुरधाम स्थित शुभेच्छुकहरु तथा कोभिड–१९ मा समाजसेवाका लागि गठित क्वीक रेस्पोन्स टिमको संयुक्त आयोजनामा यस क्षेत्रका गरिब तथा विपन्नहरुका लागि उनीहरुकै वडा र टोलहरुमा निःशुल्क स्वास्थ्य शिविरको आयोजना गर्ने गरिएको छ ।
टिमले गरिब तथा विपन्न बस्तीहरुमै चिकित्सकहरुसहित पुगेर निःशुल्क स्वास्थ्य शिविर गरिरहेको छ । प्रत्येक शनिबार शिविर आयोजना गर्दै आइरहेको छ । पाँचौ सप्ताहमा विभिन्न वडामा गरि करिव दुई हजार स्थानीयले स्वास्थ्य उपचार गराएको टिमका संयोजक मनोज साहले बताए ।
निःशुल्क शिविरमा हरेक विभागका विशेषज्ञ चिकित्सहरुको टिमले सम्बन्धित विरामीहरुको उपचार गर्ने गरेको छ । त्यतिमात्र होइन प्याथोलोजी ल्याबको परीक्षणका साथै औषधिसमेत निःशुल्क वितरण भइरहेको टिमले जनाएको छ । वडा र टोलमै निःशुल्क स्वास्थ्य उपचार सेवा पाएपछि स्थानियवासीहरु खुसी भएका छन् ।
धनुषाको धनौजी गाँउपालिका—५ बहुअर्वामा आयोजित निःशुल्क स्वास्थ्य शिविरमा उपचार गराउन आएका स्थानीय गीतादेवी महरा र रामशोभित मण्डल निःशुल्क शिविरले एकदमै राहत भएको बताए । शिविरमा मात्र करिव ६ सय जनाले स्वास्थ्य उपचार सेवा लिएका छन् ।
साताको एक दिन शनिबार गरिब तथा विपन्नको निःशुल्क सेवा गर्न पाँउदा चिकित्सकसमेत खुसी छन् । अभाव र समस्यामा रहेकाहरुको सेवा गर्न पाँउदा बेग्लै खुसी महसुस हुने गरेको चिकित्सकहरु बताउँछन् । शिविरमा संलग्न दन्त रोग विशेषज्ञ डा. सज्जन ठाकुरले आफ्नो क्लिनिकभन्दा अलग र सद्भावमूलक मिठो अनुभव यस्ता शिविरहरुवाट प्राप्त भइरहेको अनुभव सुनाए । शिविरमा प्रदेशसभा सांसद रामसरोज यादव, जीवनाथ चौधरी, सन्तोष यादव, नेतृ सम्झना वर्मालगायतको समेत उपस्थिती थियो ।
